Velsiekte by skaaphond

Vraag:
Ons skaaphond se vel is droog, jeukerig en sy stink. Sy krap haarself stukkend en haar hare val uit op die jeukerige gedeeltes. Sy swem winter en somer. Daar is nie chloor in die water nie, want ons gebruik 'n Electronaut. Ek was al hoeveel keer by die veearts, sy kommentaar is dat sy allergies is vir vlooie, sy kortisooninspuitings help nie vir lank nie. Ek was bang vir brandsiekte. Ek gooi Pour-On op, maar sy swem dit af. Moet ek maar soos ons voorvaders maak en ou motorolie gebruik? Ek is skrikkerig vir so iets en ek glo ook nie aan al wat 'n boereraat is nie. Jessie is pragtig en ek wil haar graag help. Help asb. - Suzette Visser (suzette.visser@xps.cfgrp.co.za)

Antwoord:
Jeukery op honde se vel is 'n probleem wat gereeld voorkom. By party rasse is die probleem erger as by ander. Duitse herdershonde, Jack Russells en Maltese poedels is bekend vir hulle velprobleme.

Daar is verskeie oorsake wat 'n hond se vel kan laat jeuk. Van hierdie kondisies kan net deur 'n veearts gediagnoseer word. Hierdie oorsake is probleme soos myte, luise en swaminfeksies. Die probleem is maklik behandelbaar as die regte toetse gedoen is om die oorsaak vas te stel. Ander oorsake van jeukerige vel is allergieë teen stof, plante en kos. Vlooie kan ook 'n rol speel en allergieë teen vlooie is algemeen. Dit verg net een vlooibyt om 'n allergiese reaksie te veroorsaak. Party honde het ook 'n geneigheid om 'n droë vel te hê.

Algemene voorsorgmaatreels wat u by die huis kan tref, is om seker te maak dat jou hond teen vlooie behandel is. Gewone aqua-room kan op die jeukerige vel gesmeer word. As dit nie help nie, kan 'n buisie gewone kortisoonroom by die apteek gekoop word. 'n Halwe teelepel sonneblomolie elke tweede tot derde dag, kan op die hond se kos gegooi word. Indien daar nie verbetering is nie, sal u weer 'n veearts moet raadpleeg.

21 September 2005