Vlooie in vakansiehuis

Soos met meeste ander parasiet aangeleenthede verkies ek om met die lewensiklus te begin. In die betrokke siklus is daar volwasse vlooie, eiers, larwes en papies betrokke. Na ‘n bloedmaal lê die wyfievlooi ongeveer 15 tot 20 eiers per dag op die gasheer. Die eiers word los op die hare gelê en val feitlik enige plek af, veral op plekke waar die diere rus (soos in slaaphokke of selfs matte indien die dier binneshuis toegelaat word). Die larwes wat uitbroei, voed nie op bloed nie, maar op feitlik enige organiese detritus (bv. dooie vel en hare). Na ‘n aantal vervellings (daar is drie larfstadiums) weef die larf ‘n kokon en ‘n papie vorm. Binne die kokon ontwikkel die volwasse vlooi. Die vlooie kan selfs in die kokon bly tot ‘n stimulus ontvang word wat aandui dat daar ‘n voedselbron naby is. Dit kan in die vorm wees van vibrasies, druk, hitte, geraas of selfs koolstofdioksied.