Oumansoutbosaanplantings
Ingestuur deur Onbekende besoeker op 20 Januarie, 2012 - 07:54
Vraag
Ek wil graag meer uitvind oor die aanplant van soutbos. Hoe gaan mens te werk en watter voordele hou dit in vir skape?
Antwoord
Deur: PROF. CHRIS DANNHAUSER
Dr Jasper Coetzee het die gebruik en voedingswaarde van Oumansoutbos (OMS) goed aangespreek. (Sien skakels onder) Dit is hieruit duidelik dat dit verkieslik nie vir afronding gebruik moet word nie, maar vir onderhoud van die skape soos byvoorbeeld die teeltrop.
Die vestigig van Oumansoutbos word gewoonlik gedoen deur die sade te laat ontkiem in saailaaie of sakkies en dan die saailinge te verplant. Die saad word ook in lopende water afgespoel om remstowwe te verwyder. Saailinge behoort in die handel beskikbaar te wees. ‘n Goeie stand is 2500 tot 3000 plante per ha, wat beteken dat plante 1.75 tot 2 m uit mekaar geplaas word. Dit is ook nodig om die jong saailinge te besproei na hervestiging, met behulp van drup-besproeiing, leivore of ‘n waterkar. Vir nadere besonderhede oor saad- en plantjiebeskikbaarheid en bestuur kan die weidingkudiges van Grootfontein Landbou Kollege genader word. ‘n Kontakpersoon daar is: dr. Loraine van den Berg (lorainevdb@daff.gov) of JH Hoon, Grootfontein Landbou Kollege, Tel 0498026740.
Die hoë sout-inhoud van die gewas bly altyd belangrik in die sin dat voldoende water voorsien moet word. Dit is verder ook belangrik dat skape oor tyd aangepas moet word (tot soveel as 3 weke) op die Oumansoutbos, aangesien dit so totaal verskil van ander ruvoerbronne, in terme van smaak en sout-inhoud.
Om te ontwikkel van ‘n kiemplant tot ‘n weibare struik neem gewoonlik ‘n jaar en beweiding is dus eers in die tweede jaar moontlik. Droë materiaal produksiesyfers van tussen 2 en 4.76 t/ha word deur de Kock (1980) aangedui en dit is ongeveer 8 tot 18 t/ha nat materiaal. Die volgende statistiek word deur Hoon (2010), ook van Grootfontein Landbou Ontwikkelings Instituut, aangegee:
· ‘n Drakrag van 21 skape/ha vir 4 maande by ‘n plantdigtheid van 2500 plante/ha
· ‘n Proteïen-inhoud van 16-22%
· Oumansoutbos kan as onderhoud ruvoer vir skape dien, selfs vir dagtige ooie, met addisionele energievoeding.
Geskryf deur: prof. Chris Dannhauser, Weidingskundige (chriswei@vodamail.co.za)
13 Januarie 2012
Maar ek waarsku, in goeie grond, is hy nie ‘n bossie nie maar eerder ‘n bos! Het bestuur nodig en kan vervuil! Myne wil ek uit en weg hê. Ek het al tot met ‘n vliegtuig probeer spuit om oumansoutbos uit te roei! Baie gehard!
Ja, dit is destyds op brak/swak/uitval grond geplant by ons! Veronderstel om ‘n klein bossie te raak wat droё ooie op loop! Kameelperde sal nou goed doen in die blokke, dis ‘n nes vir Rooikat, en bosluis. Ek sou verkies het dat dit uitgeroei raak en dat ‘n brak verdragsame klawer/medic/grass mengsel daar sou gevestig word! Maar ek kry nie die ding dood nie! Met baie sterk mengsels gif wel met baie water maar jy kan nie inkom met n spuit want op plekke is die goed by ons bakkie dak hoogte en hoёr. Jy is veronderstel om dit elke twee jaar of wat met bossieslaner by te kom, maar dan kom die stokke die trekker bande ook by! Trekkerbande is ongelukkig alles behawe goedkoop! Op ‘n dag sal ek ‘n kruip trekker insit met ‘n PTO en die blokke finaal “uitsort”! In droёer dele waar daar nie diep grond is nie, sal ek hom plant maar nie in natter dele en ek dink in die Karoo het hy definitief ‘n plek! Dink altyd aan die lande by Touwsrivier waar soutbos staan, as hy so lyk is dit fantasties!
Richard Krige (Boontjieskraal, Caledon)
19 Januarie 2012
Lees ook:
Addisionele dokument
- 722 keer gelees
Geborgde skakels
Daaglikse nuusbrief
Weeklikse nuusbrief
Teken In
E-pos forum
Gewildste stories
Alle regte voorbehou. © Landbou.com 2011. In Suid-Afrika gepubliseer deur Media24
Web Development by FormFunction
Kommentaar
Lewer kommentaar. (Jy hoef nie ingeteken te wees nie.)