Tef en hawer wisselbou
Ingestuur deur Onbekende besoeker op 23 Januarie, 2012 - 07:46
Vraag
Ek plant tef en hawer wat ek baal en verkoop aan perdeboere. Ek het in die somer van 2010 tef geplant en in die winter, hawer op dieselfde land. Ek het nou weer tef geplant en dit het totaal misluk. Dit wys natuurlik dat die hawer te veel voeding uit die grond uithaal. Wat is ’n beter opsie vir my om te volg? Kan julle my asseblief help met ‘n wisselbouprogram van gewasse wat my sal help om nie my grond uit te put nie, maar waarmee ek ook kos kan produseer om te verkoop.
Antwoord
Deur: PROF. CHRIS DANNHAUSER
Tef en hawer is teoreties ‘n goeie kombinasie van wisselbougewasse, aangesien dit in verskillende seisoene groei, mits daar genoeg water is. Die feit dat u dit suksesvol kon doen, dui aan dat u dit onder besproeiing doen. Dit is wel moontlik om met hierdie twee oeste ten minste 12 t/ha per jaar te produseer. Dit beteken verder dat u ten minste 100 tot 120 kg N/ha en 24 kg P/ha per jaar uit die grond verwyder, wat tot voedingstekorte kan lei. Die verdere probleem met so ‘n intensiewe hooiproduksie-sisteem is die verwydering van materiaal bogronds en ook organiese materiaal uit die grond. Indien so ’n wisselboustelsel oor baie jare gedoen is, sal dit die voedingswaarde van die grond uitput. Wat pla is dat u dit slegs vanaf 2010 doen en nou al probleme ondervind!
Behalwe grondvrugbaarheid speel grondvog natuurlik ook ‘n groot rol in ontkieming van saad. Vir suksesvolle ontkieming en produksie van so ‘n stelsel sal u vir die volle jaar ten minste 25 to 35 mm besproeiing per week moet toedien. Die regte plantdatum is ook belangrik. Hawer moet verkieslik Februarie tot April geplant word en tef behoort November/Desember geplant te word. Dit is al ekserimenteel in die Wes-Kaap bewys dat so ‘n wisselboustelsel volhoubaar kan wees as daar ook ‘n peulgewas ingebring kan word, soos Serradella in die winter of Sonhemp in die somer. Lusern (vir ‘n langer periode) werk natuurlik ook goed.
Die aanbeveling is dat u:
- Seker maak u koop goeie kwaliteit saad by ‘n erkende saadhandelaar.
- Seker maak dat u voldoende besproei.
- So gou moontlik ‘n grondontleding laat doen om moontlike tekorte vas te stel (organiese materiaalinhoud ingesluit).
- Die inbring van ‘n peulgewas oorweeg.
Ek help graag as u verdere inligting nodig het en stel voor u kontak my weer na ‘n grondontleding gedoen is.
Geskryf deur: prof. Chris Dannhauser, weidingskundige (chriswei@vodamail.co.za)
23 Januarie 2012
Addisionele dokument
- 506 keer gelees
Geborgde skakels
Daaglikse nuusbrief
Weeklikse nuusbrief
Teken In
E-pos forum
Gewildste stories
Alle regte voorbehou. © Landbou.com 2011. In Suid-Afrika gepubliseer deur Media24
Web Development by FormFunction
Kommentaar
ek wil graag weet wat is die beste tyd om die twee gewasse te plsnt in heidelberg g prov baie dankie
Lewer kommentaar. (Jy hoef nie ingeteken te wees nie.)