KWV, werkers praat oor aflegging

Meer as 100 mense — amper 'n vyfde van die KWV se 575 plaaslike werknemers — kan moontlik hul werk verloor in die proses van herstrukturering wat by dié maatskappy aan die gang is.

Mnr. Niel van Staden, woordvoerder van die maatskappy, sê geen werknemers het nog hul werk verloor nie. "Niks is nog gefinaliseer nie. Onderhandelinge, gefasiliteer deur die kommissie vir konsiliasie, mediasie en arbitrasie (CCMA), is aan die gang en die verskillende partye kan nog voorstelle maak van hoe herstrukturering behoort plaas te vind."

Volgens hom is die herstrukturering nodig om die doeltreffendheid en winsgewendheid van die maatskappy te verbeter.

Van Staden sê verder dat werk op alle posgrade in gedrang is.

Die doeldatum vir die herstrukturering is einde Julie.

8 Julie 2005