Landbou-dorpe 'n ideale projek

'n Taakspan is op die been gebring om te kyk hoe die kwessie van behuising vir plaaswerkers aangepak kan word.

Mnr. Itumeleng Kotsoane, Adjunkminister vir Behuising, het in die Parlement gesê die span moet gebiede uitwys waar behuisingsprojekte vir plaaswerkers opgerig kan word. Dit moet ook wetgewing en eienaarskap ondersoek.

Die bou van huise op plase kan problematies wees — veral wanneer 'n werker op 'n ander plaas gaan werk of ontslaan word. 'n Twis kan tussen die boer en die werker ontstaan oor wie die geregtelike eienaar van die huis is.

Daarom sal een van die beste opsies wees om grond te identifiseer waar landboudorpe opgerig kan word, sê Kotsoane. In Bothaville in die Vrystaat is só 'n dorpie net meer as 'n dekade gelede gestig. Die munisipaliteit en boere het die grond beskikbaar gestel sodat huise vir die plaaswerkers gebou kon word.

Kotsoane sê dat as daar 'n stuk grond geïdentifiseer word wat sentraal geleë is en al die belanghebbendes stem daartoe in, sal die Regering landboudorpe vir die werkers oprig. "Landboudorpe is 'n ideale projek om te onderneem."

Landbouweekblad, 16 Mei 2008