Landbou kan Kiwi's red

'n Oplewing in landbou-uitvoere kan Nieu-Seeland se ekonomie oor die volgende twee jaar uit die greep van 'n resessie hou, volgens die nuutste voorspellings van dié land se ministerie van landbou en bosbou.

Die inkomste van die Nieu-Seelandse landbousektor behoort vir die eerste keer in 2009 meer as $20 miljard te beloop weens beter produksie ná die droogte wat die land geteister het en 'n dalende wisselkoers.

Die landbouministerie voorspel goeie prestasie vir die melkbedryf ten spyte van 'n korttermyn daling in pryse en verwag ook beter terugkeer van die bees- en skaapbedryf, berig die New Zealand Herald. Uitvoere vir die melkbedryf behoort teen 2012 tot $11,9 miljard te groei terwyl beesuitvoere na verwagting tot $42,3 miljard sal verbeter. Kiwivrug- en wynuitvoere behoort ook teen 2012 meer as $1 miljard te beloop.

Bruto landbouproduksie kan met soveel as 26,5% groei van $18,9 miljard in 2008 tot $23,9 miljard in 2012. Mnr. Murray Sherwin, die direkteur-generaal van die landbouministerie, meen dat verbeterende plaaslike omstandighede en stygende internasionale vraag na landboukommoditeite vertroue in sy land se landboubedryf sal help herstel.

7 Augustus 2008