Landbou verwelkom stap oor Zuma

Leiers in die landbou het pres. Thabo Mbeki se afdanking van mnr. Jacob Zuma as die land se visepresident verwelkom as "goed vir landbou en die hele ekonomie".

Dié stap is beskryf as dat dit buitelandse vertroue inboesem, 'n sterk standpunt teen korrupsie is en wys die president is ernstig oor goeie regering.

Mnr. Lourie Bosman, voorsitter van Agri SA, sê daar was in die laaste tyd 'n paar goeie seine wat buitelandse vertroue inboesem. "Dit wys die Regering neem standpunt in vír demokrasie en téén korrupsie." Hy sê eers het die regbank in die uitspraak oor die Modderklip-saak getoon dat hy die beginsels van eiendomsreg in die Grondwet sal beskerm. "Daarna het die president sterk standpunt ter wille van demokrasie en die uitwissing van korrupsie ingeneem."

Hy sê ongelukkig het die dreigemente van grondonteiening die afgelope tyd ook 'n skaduwee gewerp oor die gunstige gebeure.

Mnr. Paul van der Walt, voorsitter van die TLU SA, sê Mbeki se optrede is prysenswaardig aangesien hy bekommerd was dat Zuma bloot beskerm sou word. "As die president ernstig is om korrupsie uit te roei, moet hy dit nou verder voer en optree teen diegene in die parlement wat na bewering by die reisskandaal betrokke is. Dit sal die boodskap versterk dat hy ernstig is om nie misdaad te duld nie."

Mnr. Bully Botma, voorsitter van Graan SA, sê hy is opgewonde oor Mbeki se sterk standpunt oor goeie regering. "Hy het gewys dat dié beginsel nie onderhandelbaar is nie en dat hy misdaad wil bestry."

Dr. Tobias Doyer, uitvoerende direkteur van die Landboubesigheidskamer, meen Mbeki se optrede is baie gunstig vir sakevertroue en Suid-Afrika se beeld in die buiteland. Hy sê dit is verblydend dat die president genoeg vertroue in die ANC-alliansie gehad het om dié stap te doen "en die aanhangers van 'n vryemarkfilosofie het die toets deurstaan".

Volgens Bosman was dit juis die kommersiële landbouwerkgroep se oogmerk om in sy gesprek met die president verlede week klem te lê op die manier waarop die landbou met die res van die land se ekonomie geïntegreer is. Die plan was om te fokus op 'n makro-ekonomiese voorlegging om aan die president te toon dat die landbou 'n krisis in die gesig staar weens lae kommoditeitspryse en swak mededingendheid.

Hy sê in sulke toestande is voorrangsake, soos swart ekonomiese bemagtiging in die landbou en grondhervorming, moeilik haalbaar en daar sou klem gelê word op oplossings, soos etanol se rol om die graanmark uit te brei en groter mededingendheid.

24 Junie 2005