Landbou wys leierskap

Die bydrae van die landbou tot die ontwikkeling en groei van die Wes-Kaap is deurgaans misgekyk. Derhalwe is die bekendstelling van 'n landbou- en landbou-ondernemingstrategie vir dié provinsie 'n geskiedkundige dag, het mnr. Adrian Sayers, hoof uitvoerende beampte van die provinsiale ontwikkelingsraad wat die strategie voorberei het, gesê.

"Hiermee wys die landbou ware leierskap in vergelyking met ander sektore," het Sayers gesê.

Die voorlopige strategie is op Elsenburg aan mnr. Cobus Dowry, Wes-Kaapse minister van landbou, oorhandig.

Die finale dokument gaan by 'n landbouberaad in Julie in die Wes-Kaap bekend gestel word. Daar is net nog sowat twee weke om voorstelle en kommentaar op dié strategie te lewer.

Dié proses is verlede jaar begin toe 'n tussentydse stuurkomitee met verteenwoordigers van die Regering, ondernemings, werkers en die publiek sleutelstrategieë vir verskeie bedrywe opgestel het.

Die belangrikste kwessies wat uitgewys is, is grondhervorming, bemagtiging in die landbou (AgriSEB), menslike hulpbronontwikkeling en maatskaplike- en plaaswerkeraangeleenthede. Die mededingendheid in landboubemarking, marktoegang en markontwikkeling is ook geïdentifiseer.

Van die betrokkenes is Agri Wes-Kaap, die National African Farmers' Union, Cosatu en die provinsiale departement van landbou en grondsake.

Dr. Piet van Rooyen, hoofdirekteur van die Wes-Kaapse departement van landbou, sê hoewel samewerking altyd nagestreef word, is dit nooit maklik om te bewerkstellig nie.

8 Julie 2005