Landbouleier erg aangerand

Die voorsitter van Agri Pretoria, dr. Frans Saaijman, is in sy huis deur rowers oorval en kwaai aangerand.

Dié skoknuus is in die oggendblad, Beeld, bekend gemaak.

"Ek het my hande op my bors gevou en gesê jy gaan my nie skiet nie. Sit neer die wapen. Toe sit hy dit werklikwaar neer, maar toe begin die ander twee my met kieries slaan."

Só het dr. Frans Saaijman (63) van Lynnwood in Pretoria gister gesê. Hy is die afgelope 30 jaar 'n algemene mediese praktisyn.

Saaijman, voorsitter van Agri Pretoria, en sy vrou, Jeanette (63), is Maandagaand omstreeks 21:30 tuis deur drie gewapende rowers oorval.

Hy het twee ribbes gebreek, sy linkeroogbank is gebreek, hy het harsingskudding opgedoen, moes verskeie steke op sy kop en oog kry en sy oë is blou en toegeslaan.