Landbousubsidies dalk afgeskaf

Talle ontwikkelende lande en Suid-Afrika het op die afgelope G8-beraad in Gleneagles, Skotland, duim vasgehou dat landbousubsidies afgeskaf sou word.

Dit lyk asof landbousubsidies afgeskaf kan word mits die Europese Unie (EU) en Amerika 'n vennootskap hieroor aangaan, het me. Mariann Fischer Boel, die EU se kommissaris vir landbou en landelike ontwikkeling, gesê.

Sy het gereageer ná President George W. Bush van Amerika in 'n onderhoud laat blyk het sy land is bereid om landbouhervorming te oorweeg en subsidies af te skaf.

"Ek is bly oor Amerika se bereidwilligheid om ernstig na hervorming in die landbou te kyk en om sy 'Farm Bill' vir bespreking te oorweeg," het sy gesê.

Sy sê van die grootste hervormings in die Europese geskiedenis is pas aan sy gemeenskaplike landboubeleid aangebring. "Ons is bereid om ons kontraktueel aan hierdie hervormings deur die Wêreldhandelsorganisasie (WHO) te verbind, maar ons vennote moet ons ideaal nastreef," het sy gesê.

Volgens haar is die manier waarop Europese boere gesubsidieer word, besig om te verander. Subsidies word blykbaar nie meer gekoppel aan wát geproduseer word nie en dus verwring subsidies nie die handel nie. Die subsidies poog om hoë vlakke van standaarde vir die omgewing en dieregesondheid daar te stel. Innovasie en diversifikasie in landelike gebiede word ook op prys gestel.

"Voor ons op 'n sperdatum vir die afskaffing van uitvoersubsidies kan ooreenkom, moet Amerika egter onderneem om uitvoerkrediete en die gebruik van weifelende 'voedselbystand' om van oorskotte ontslae te raak, af te skaf," het sy gesê.

Sy sê Europa hoop om teen Desember vanjaar by die WHO se ministeriële vergadering in Hongkong 'n "omvattende transaksie" te beklink, want volgens haar is handel beter as bystand.

Sy sê daar word vanaf 2009 beoog dat die wêreld se 50 armste lande "alles behalwe wapens" na Europa sal kan uitvoer — "vry van tariewe en kwotas".

15 Julie 2005