Langa ontstel die Land Bank

Die Land Bank het sy voormalige voorsitter, mnr. Themba Langa, gemaan om sy veldtog van disinformasie teenoor die bank dadelik stop te sit. Die bank se raad het Vrydag in Pretoria byeengekom en het ook gesê Langa moet die bank kliënte se reg tot privaatheid respekteer.

Die raad voel dat dit roekeloos van Langa is om Land Bankkliënte se private aangeleenthede in die media te bespreek en meen dat sy optrede die bank se vertroulikheidsklousule rakende kliënte verbreek.

Die bank sê ook dat Langa se aantygings dat die Minister van Landbou en Grondsake met sy raad inmeng onwaar is.

Die raad het ook nog nie 'n kandidaat vir die posisie van bestuurshoof nie, maar is steeds besig om 'n nuwe kandidaat te soek. Dié proses vereis die betrokkenheid van die bank se raad, die minister en die tesourie.

Die Land Bank is ook ontsteld dat Langa nie aanvaar dat die rede vir sy afdanking sy verontagsaming van raadsbesluite was nie. Die bank het Langa gemaan dat hy nie meer as spreekbuis vir die maatskappy is nie en sê ook dat die bank Minister Lulu Xingwala se besluit om Langa af te dank ten volle ondersteun.

14 Julie 2008