LBW-man wen studieprys

Mnr. Ainsley Moos, senior joernalis van Landbouweekblad, is die wenner van die Ou Mutual se studieprys vir landboujoernaliste. Hy is 'n senior in-diepte skrywer in Landbouweekblad se Pretoriase kantoor.

Moos (27) is deur die Landbouskrywersvereniging van Suid-Afrika as wenner aangewys. Hy moet die beursgeld gebruik om vanjaar se internasionale kongres vir landboujoernaliste in Swisterland, wat deur die Internasionale Federasie van Landboujoernaliste (IFAJ) aangebied word, by te woon. Die kongres word van 31 Augustus tot 4 September gehou. Hy sal mnr. Reg Weiss van die Paarl, vaste verteenwoordiger van die vereniging en tans die IFAJ se ondervoorsitter in Afrika, vergesel. Weiss is 'n oud-redaksielid van Landbouweekblad.

Mnr. Schalk Burger, markontwikkelingsbestuurder by Ou Mutual en borg van die studieprys, sê landboujoernaliste speel 'n belangrike rol in die uitbou van die ekonomie. Dit is gevolglik belangrik dat uitnemende joernaliste in hierdie sektor die nodige erkenning vir hul bydraes ontvang.

Moos het verlede jaar as gas van die United States Grains Council 'n biotegnologie-toer na San Francisco, Des Moines en St. Louis in Amerika, asook Guelph in Kanada, onderneem. In 2002 het hy ook die redakteursprys by Beeld ontvang as die belowendste joernalis.

Hy is 'n boorling van Oudtshoorn en het aan Bridgton Senior Sekondêr gematrikuleer. Hy het sy BA en honneursgraad in die Joernalistiek aan die Universiteit van Stellenbosch verwerf.

22 Julie 2005