Nou soek hy ’n spontane vrou wat by sy omgewing kan aanpas en lief is vir diere en die natuur.

Jy boer nogal in ’n afgeleë omgewing. Jy ontmoet seker nie baie nuwe mense nie.  Is dit hoekom jy vir Boer soek ’n Vrou ingeskryf het?
Dit is een van die redes. Vroeër jare het die meeste boere in die omgewing getrou met die nuwe onderwyseresse wat op nabygeleë dorpe kom skoolhou het. Nou kom daar nie meer so baie nuwe onderwyseresse nie, en dié wat wel kom, word vinnig opgeraap.

Ek moet dus eintlik in die Kaap gaan “jag”. Ek dink Boer soek ’n Vrou is ’n goeie geleentheid om meisies te ontmoet.
 
Jy is ’n gekwalifiseerde ingenieur, tog het jy gekies om terug te gaan plaas toe. Hoekom?
My hart is op die plaas, dit was al eintlik so van voor skool af. Ek het ná skool op Stellenbosch gaan swot en het eintlik nie geweet wat ek wil doen nie. Ek was ook nie by een van die beroepsvoorligters nie. 

Ek het nog altyd gehou van liggies en kragdraadjies, en het toe gehoor van elektriese ingenieurswese en dat hulle nogal geld maak. Dit was die groot aantrekkingskrag. Ek het van die eerste dag af geweet ek sal terugkom plaas toe.

Ek het eers ’n paar maande in die Kaap gaan werk, toe in London en in Europa getoer en daarna weer in die Kaap gaan werk. Vier jaar gelede was ons besigheid só dat ek kon terugkom plaas toe en saam met my pa kon boer – op verskillende plase. Ek was nog nooit spyt nie. Ek het nog altyd geweet dit is waar ek wil wees.

Hoe sien jy die toekoms van die landbou in jou omgewing?
Ek is positief daaroor, seker omdat ek nog ’n jong man is. Party manne sê daar is beter dele in die land om in te boer, omdat die reënval beter is. Maar ek weet ook die gras lyk baie keer groener aan die ander kant van die draad. Al is ons reënval marginaal, is dié wêreld eintlik uniek. Dit is ’n gesonde wêreld en die diere vaar goed. Ons streek is ook geseënd om een van die laagste misdaadsyfers in die land te hê.

Dink jy ’n vrou kan maklik aanpas op die plaas?
As haar ingesteldheid reg is, sal sy maklik aanpas. My vrou hoef nie net ’n huisvrou te wees nie. Dit sal welkom en lekker wees as sy aan die boerdery deelneem en saam met my droom en planne maak. Sy kan ook haar eie onderneming, soos ’n gastehuis, bedryf. Hier is baie Gautengers wat ons rus en stilte kom opsoek.

Ek sien jy hou daarvan om oorsee te reis. Wat is jou gunsteling-bestemming?
Ek was bevoorreg om al in Israel te wees en ek sal bitter graag weer wil teruggaan. Ons was ’n groepie Afrikaanse mense wat op ’n geestelike verrykingstoer was. Ek sal graag eendag my vrou en kinders soontoe wil neem. In Europa sal ek Frankryk en Switserland uitsonder as twee lande wat vir my uitgestaan het en wat ek graag weer wil besoek.