As daar een ding is wat talle Suid-Afrikaners se harte warm laat klop, dan is dit boerekos. En Arina du Plessis,
Landbouweekblad se kosredakteur, kén boerekos – sy is immers ’n boerenooi van Prince Alfred Hamlet in die Wes-Kaap.
Arina is al jare lank die baasbrein agter resepte wat op plase en dorpe dwarsoor Suid-Afrika gekook, gebak en geniet word. Dit is die gewildheid van dié resepte wat gelei het tot die besluit om ’n spinternuwe kostydskrif,
Boerekos, uit die
Landbouweekblad-stal die lig te laat sien.
Dié tydskrif bevat bykans 200 van Arina se beste resepte – almal pure boerekos met hier en daar ’n moderne kinkel en ’n kortpad of twee ingeroer.
“Ek hoop ons lesers kan sien en voel dat die inhoud vir hulle geskryf is, nie om enigiemand te probeer beïndruk nie, maar om ’n praktiese, goeie kosvriend in elke leser se kombuis te wees. Dis eerlik en sonder pretensie. Dis soos ons kook in die
Boerekos-toetskombuis – niks word agterna blinkgepoets of gedokter om mooier te lyk nie – dis egte, eerlike kos,” sê Arina.
Behalwe vir die resepte is daar ook talle onderhoude met boere oor die produkte wat hulle lewer. Hieronder tel onder andere Lario Moolman, ’n kruieboer van Franschhoek, Schalk du Beer, ’n sampioenboer van die Hemel-en-Aardevallei en Heinrich Lategan, ’n wynmaker van die Breederiviervallei, wat nou pesto maak en verkoop (plus ’n resep oor hoe om jou eie basiliepesto te maak!). Tussendeur gevleg is nuttige kombuiswenke wat beslis tyd, moeite en geld in jou kombuis sal spaar!
“Die onderhoude met die boere maak ’n mens van vooraf bewus van die reuse-rol wat boere in ons dag tot dag bestaan speel. Dit is boonop heerlike leesstof en baie interessant daarby,” sê Arina.
Boerekos het iets vir almal, ’n tipiese plaasbraai, kompleet met skilpadjies en roosterkoek, ’n reuse-afdeling oor vinnige aandetes wat jou genoeg ete-idees vir ’n jaar sal gee en ’n lekker padkosstorie met ’n goeie skoot nostalgie – iets waarvoor Suid-Afrikaners maar te lief is. Liplekker resepte, soos kaasgevulde hoenderborsies, frikkadelle in rooiwyn-tamatiesous, kerriesosaties met rooibostee en speseryperskes met karamelsous en brosbrood vir die soettande.
Diegene wat nog altyd gewonder het oor hoe ’n kook- en fotosessie vir ’n kookboek gedoen word, kan ook kyk na twee agter-die-skerms video’s waar Arina haar heerlike braai- en padkosresepte getoets het.
En as jou mond nou so water dat jy jouself nie kan beteuel nie, gaan soek gerus ’n kopie van
Boerekos (beskikbaar vanaf die eerste week in September) teen R40 by geselekteerde CNA, Pick n Pay, Shoprite Checkers, Spar en sekere kontantwinkels naby jou. Jy kan ook ’n e-pos stuur na lbw@media24.com of 021 406 4962 skakel.
Hier is 'n agter-die-skerm-kykie na een van die fotosessies wat spesiaal deur Landbouweekblad vir Boerekos gedoen is.
