Gesels ’n mens met diegene oor 25 jaar oud oor familievakansies en die lang pad, word die woord padkos baie vinig genoem.
Wie onthou dan nou nie hoe dit voel om die hele gesin in ’n (meestal beknopte, volgepakte) motor te laai en die langpad aan te durf met flesse warm koffie en ‘‘tupperware’-bakke volgepak met hardgekookte eiers, koue hoenderboudjies, frikkadelle en boerewors en ’n papperige toebroodjie of tien nie!
In Landbouweekblad se splinternuwe kostydskrif, Boerekos, word hulde betoon aan die dae van langpad ry saam met gesinslede wat dalk nie meer so lus is vir mekaar nie, aan langs die pad stop en die mandjies, komberse en dalk selfs ’n braaier afpak.
Verskeie redaksielede vertel hoe hul gesinne padkos geniet het. Theuns Botha, wat gebore is in die tyd toe mense nog met perdekarre gery het, vertel hoekom hy steeds nie ’n hardgekookte eier in die gesig kan kyk nie, Amelia Genis vertel van die stewige toebroondjies met brood wat haar ma gebak het van growwe meel wat gemaal is van koring wat op hul plaas in Namakwaland geproduseer is.
Hoewel hedendaagse gesinne nie altyd meer die gebruiklike papperige broodjie en hardgekookte eier inpak nie, is dit nie te sê dat ’n mens nie meer lekker padkos kry nie! In Boerekos is onder meer resepte vir boereworspasteie, geurige Chakalaka-muffins en heerlike sjokoladebruintjies.
En as jou mond nou so water dat jy jouself nie kan beteuel nie, gaan soek gerus ’n eksemplaar van Boerekos (beskikbaar vanaf die eerste week in September) teen R40 by geselekteerde CNA, Pick n Pay, Shoprite Checkers, Spar en sekere kontantwinkels naby jou. Jy kan ook e-pos stuur na
lbw@media24.com of 021 406 4962 skakel.
Kyk hier na ’n agter-die-skerms-video van ons Padkos-fotosessie wat spesiaal vir Boerekos gemaak is.
