Die idee vir dié vleisfees het ontstaan toe die beesvleis-kenner Steve Maresch, eienaar van The Local Grill-restaurante in Johannesburg, besef het hoe belangrik dit is dat mense beter ingelig moet word oor beesvleis.

“Suid-Afrika het van die beste beesvleis ter wêreld,” sê Maresch. “Ons moet verbruikers laat weet van hierdie wonderlike kossoort – waar om dit te koop, hoe om dit voor te berei en hoe om dit te geniet.”

Die hoogtepunt van die skou is die Ultimate Beef Challenge waar fynproewers lendeskyf van verskillende beesrasse in ’n blindeproe-sessie met mekaar gaan vergelyk.

Rooi Angus, Swart Angus, Afrikaner, Dexter, Nguni, Sussex en selfs Jersey sal geproe word. Die beoordelaars bestaan uit plaaslike en internasionale kenners, onder andere Mark Shatzker, die Kanadese skrywer van die boek Steak. Hy het drie jaar die wêreld oor gereis om die beste steak te vind.

Kyk hier na ’n onderhoud met Maresch.




Die skou sal iets vir beesvleis-liefhebbers se hele gesin bied. Op die skou is ’n groot verskeidenheid uitstallers te sien, ’n beesvleis-en-bier-proesessie word aangebied, daar is ’n verskeidenheid kosstalletjies en demonstrasie-areas, ’n meganiese bul en ’n speelgebied vir kinders.

Gaan na www.ultimatebeef.co.za vir nog inligting oor die skou.

Vir mense wat ’n liplek-lekker beesvleisgereg soek, gaan loer gerus na Arina du Plessis, Landbouweekblad se kosredakteur, sê resep vir beesvleisskenkel. Kliek hier vir die resep.