Ek kook dié resep graag met appelbier, soos Savannah, maar jy kan water of appelsap ook gebruik. Tradisioneel kry appelbotter fyn naeltjies in, maar ek verkies dit met ’n sagter geur, en daarom sit ek eerder kardamom by.

2 kg appels van jou keuse, geskil en ontkern
500 ml appelbier
Witsuiker
10 ml kaneel
3 ml fyn kardemom
5 ml fyn gemmer
2 ml fyn piment (allspice)

Kap die appels in growwe stukke en verhit tot kookpunt in ’n kastrol saam met die appelbier. Bedek en prut tot die appels sag is. Druk fyn tot ’n pulp met ’n aartappeldrukker. Vir elke 250 ml appelpulp, voeg 250 ml suiker by. Voeg die speserye ook by en verhit weer tot kookpunt. Prut, terwyl geroer word, oor lae hitte tot dik. Giet in gesteriliseerde flesse en verseël lugdig. Lewer 1,5 liter appelbotter.