’n Rollade is basies ’n sout rolkoek met ’n witsous-basis – dis ietwat ingewikkeld om te maak, maar as jy al voorheen rolkoek gemaak het, behoort jy dit maklik onder die knie te kry. Souttert, quiche of skons met ’n soutsmeer is nóg gewilde idees en kan alles geruime tyd voor die geleentheid gemaak word.

Rollade
45 ml botter
60 ml koekmeel
250ml warm melk
125ml gerasperde cheddarkaas
3eiers, geskei

Vulsel
1 x 230 g gerookte ham-geur roomkaas
125ml gesnipperde, gerookte ham
1x410 g blik aspersielote, baie goed
gedreineer en fyngekap 

Voorverhit die oond tot 200 °C. Smeer ’n vel bakpapier met botter of olie en gebruik dit om ’n middelslag-rolkoekpan mee uit te voer sodat die kante van die papier bo die rande van die pan uitstaan. Smelt die botter in ’n kastrol en voeg die koekmeel by. Verhit, terwyl jy roer, tot die mengsel borrel. Voeg die melk geleidelik by en hou aan roer tot die mengsel glad is en begin kook. Verwyder van die hitte en roer die kaas en eiergele by. Klits die eierwitte tot stywe punte vorm. Vou ’n groot lepel eierwit by die kaassous inomdie mengsel ligter te maak. Vou nou die res van die eierwit versigtig in tot net deurgewerk. Skep die mengsel in die voorbereide pan en smeer gelyk. Bak vir 12-15 minute tot opgepof en goudbruin. Haal uit die oond en keer die rollade uit op ’n skoon teedoek. Trek die bakpapier versigtig af en laat effens afkoel. Klop die roomkaas, ham en goed gedreineerde, gekapte aspersies saam tot sag en smeer oor die hele oppervlak van die rollade. Rol dit versigtig in die lengte op. Draai toe in waspapier of plastiek en bêre in die yskas tot nodig. Sny in skywe en sit voor.

Lewer 10 porsies.