Bobotiemaalvleis
1 ui, fyn gekap
30 ml botter
500 g maalvleis
125 ml melk
1 dik sny brood, grof gebreek
7 ml kerriepoeier
5 ml suiker
5 ml sout
3 ml borrie
30 ml blatjang
60 ml pitlose rosyne (opsioneel)
Skeut vars suurlemoensap
2 eiers, geklits
250 ml droë broodkrummels

Braai die ui in die botter tot sag en voeg die maalvleis by. Braai bruin. Terwyl die maalvleis braai, gooi die melk oor die brood en laat staan om te week. Voeg die kerriepoeier, suiker, sout en borrie by die vleis en braai tot geurig. Voeg die blatjang, brood-en-melkmengsel, rosyne en suurlemoensap by die vleismengsel en kook deur.

Laat heeltemal afkoel. Vorm die mengsel in 24 krokette en pak op ’n bakplaat. Verkoel tot net voor dit gebraai moet word. Doop elke kroket eers in geklitste eier en rol dan in krummels. Braai in vlak olie tot goudbruin, bros en deurwarm. Sit voor met bykosse van jou keuse (as ete) of met mosterdsous of tamatiesous om in te doop (as versnapering). Lewer ses porsies.