Hierdie is my staatmaker-resep. Ek vat kortpad en maak die vulsel in die voedselverwerker aan – só duur dit skaars 10 minute om die kors én vulsel kant en klaar te maak.

Ek het dié kaaskoek met bloubessie-compote versier, maar jy kan dit sonder versiersel voorsit of versier met iets anders waarvan jy hou. Dit sal net so lekker wees met suurlemoensmeer of ’n lagie karamelkondensmelk bo-op.

Kors
1 x 200 g pakkie Tennis- of Mariebeskuitjies, fyngekrummel
125ml gesmelte botter

Vulsel
3x250ghouers geroomde of gladde maaskaas
1 x 230ghouer ongegeurde roomkaas
180 ml strooisuiker
1/2 vanieljepeul, saadjies uitgeskraap OF
10 ml vanieljegeursel
4eiers
15 ml mielieblom
10 ml koekmeel

Voorverhit die oond tot 180 °C en smeer ’n veerklamppan van 24 cm goed. Meng die beskuitjiekrummels en gesmelte botter goed saam (jy kan dit ook in ’n voedselverwerker pols). Gooi die klam krummelmengsel in die pan en gebruik ’n eetlepel omdie krummels vir die kors teen die kante en op die boom van die pan vas te druk. Hou eenkant. Sit al die bestanddele vir die vulsel in ’n voedselverwerker en pols tot net glad (moenie te lank of te veel meng nie). Giet die vulsel versigtig in die kors. Sit die veerklamppan op ’n bakplaat (dit voorkom dat botter wat uit die kors smelt in jou oond uitdrup en begin brand of rook) en bak die kaaskoek vir ongeveer 45-60 minute tot net-net ferm. Skakel die oond af, maak die oonddeur oop en laat die kaaskoek vir 30 minute so afkoel. Haal uit die oond en laat buite verder afkoel tot kamertemperatuur. 

Vir bloubessie-bolaag: Verhit 300 g vars of bevrore bloubessies, ’n skeut water, 250 ml witsuiker en ’n skeut suurlemoensap oor lae hitte. Roer aanhoudend tot suiker opgelos is. Verhit tot kookpunt en kook vinnig tot dik en stroperig. Laat afkoel tot kamertemperatuur. Skep op kaaskoek net voor jy dit voorsit. Lewer 12-14 porsies.