1 klein pampoen, geskil en in blokkies gesny
Olie
2 kaneelstokke
250 ml ingedampte melk of room
1 x 400 g rol reg-om-te-gebruik broskorsdeeg (of maak jou eie)
125 ml ligbruinsuiker
4 eiers
5 ml fyn kaneel
3 ml fyn gemmer
5 ml vanieljegeursel
Knippie neutmuskaat
Knippie sout

Voorverhit die oond tot 200 °C en smeer ’n oondbak met olie. Pak die pampoenblokkies en kaneelstokke in ’n enkellaag in die oondbak en bedruip met ’n bietjie olie. Oondrooster vir ongeveer 35-40 minute, tot gaar en goudbruin. Rol intussen die deeg effens dunner uit op ’n meelbestrooide oppervlak en voer ’n gesmeerde losboomtertbord van 24 cm met die broskorsdeeg uit. Prik die boom met ’n vurk en verkoel vir 30 minute.

Wanneer die pampoen gaar is, haal uit die oond en laat effens afkoel. Verlaag die oondtemperatuur tot 180 °C en bak die broskorstertkors vir 12 minute. Haal die kaneelstokke uit en verpulp die pampoen tot glad met 125 ml van die ingedampte melk of room. Klits die res van die ingedampte melk (of room), suiker, eiers, kaneel, gemmer, vanieljegeursel, neutmuskaat en sout by. Giet in die tertkors en bak vir 30 minute tot ferm. Laat afkoel en sit teen kamertemperatuur voor met geklopte room. Lewer 12-14 porsies.