Plaaskombuis 2: Afval á la Palm

Deur Arina du Plessis
12 April 2017
In episode 1 van Plaaskombuis 2 kuier die span by Palm en Daleen Maree op Boomplaats in die Oos-Vrystaat. Plaaskombuis is op VIA (DStv-kanaal 147), Woensdae om 18:30.

Palm Maree is wyd bekend in die Oos-Vrystaat vir sy vernuf agter die kospotte — veral as ’n man wat weet hoe om vleis gaar te maak. Hy en sy vrou, Daleen, is ’n gedugte span in die kombuis. Palm sit sy afval voor met stampmielies, pampoenkoekies en geroosterde beet.

1 volledige afval, goed skoongemaak
1 skaapnek, in stukke gesaag
125 ml asyn
60 ml braaisout
15 ml elk kerriepasta en borrie
125 ml gladde appelkooskonfyt
60 ml bruinsuiker
750 g baba-aartappels, gehalveer

Sny die afval in stukkies, sit dit in ’n kastrol en bedek met water.Verhit tot kookpunt, gooi die water af en bedek weer met vars water. Verhit tot kookpunt en kook nou die afval tot dit sag is, maar nog nie van die bene af val nie.

Terwyl die afval kook, kook die skaapnek in ’n aparte kastrol in water (of aftreksel) tot die vleis van die bene af val. Verwyder die skaapnek se bene en sny die vlesi in stukkies. Voeg die gaar skaapnek by die gaar afval. Meng nou die asyn, braaisout, kerriepasta, borrie, appelkooskonfyt en suiker saam en voeg by die afval en skaapnek saam met die aartappels.

Verhit tot kookpunt en laat saggies prut tot die aartappels sag en die afvalgeurig is met ’n lang sous. Lewer 6 porsies.

Stampmieliegereg

1,5 kg stampmielies
500 g spekvleis, gesnipper
500 g (2 pakkies) sampioene, fyn gesnipper
150 g botter
3 pakkies (50 g elk) wit uiesoppoeier
150 ml room
750 ml melk
2 blikke ingedampte melk
6 x 250 ml gerasperde cheddarkaas

Week die stampmielies oornag in water. Dreineer en kook in skoon water tot sag en lymerig. Terwyl die stampmielies kook, braai die spek en sampioene in ’n eetlepel of twee van die botter tot gaar. Voorverhit die oond tot 180 °C. Smelt die res van die botter in ’n kastrol en voeg die uiesoppoeier, room, melk en ingedampte melk by. Verhit tot kookpunt en prut saggies vir ’n paar minute.

Smeer ’n groot oondbak. Skep ’n laag stampmielies in die bak, gevolg deur ’n lagie van die spek en sampioene en dan ’n lagie van die sous. Sprinkel ’n lagie kaas oor en herhaal die lae. Eindig met ’n laag kaas. Bak vir ongeveer 30 minute tot die gereg deurwarm en die kaas gesmelt is. Sit voor as bykos by ‘n braai, of saam met afval. Lewer 12 porsies.


Kommentaar

Een kommentaar op “Plaaskombuis 2: Afval á la Palm

  1. Jeanette Pickford
    Jeanette Pickford

    wens ek was daar


Lewer kommentaar

Slegs in Afrikaans

Los 'n antwoord

Alle velde moet ingevul word.

Verwante artikels