Lesotho: Staat hof toe gesleep

Die staat se beweerde onbetrokkenheid om die veiligheid van boere aangrensend met Lesotho te verseker, is deur Vrystaat Landbou op 'n spits gedryf. Dié organisasie se regstryd teen die Regering het begin ná aanmaningsbriewe op ses lede van die Kabinet, asook aan me. Beatrice Marshoff, Vrystaatse premier, en drie van haar LUR'e bestel is.

Mnr. Louw Steytler, voorsitter van Vrystaat Landbou, het op die organisasie se kongres in Bloemfontein gesê die briewe is op 11 Julie vanjaar op die ministers bestel. Dit het gevolg ná Vrystaat Landbou se regspan die afgelope 12 maande daarop voorberei het. Steytler sê as die verweerders nie binne 60 dae ná ontvangs daarop reageer en toestande aan die Vrystaatse oosgrens vir die landelike gemeenskap verbeter nie, sal die regsproses in die Vrystaatse hooggeregshof voortgesit word.

Die ministers wat in hul onderskeie hoedanighede aangemaan word, is mnre. Charles Ngaqula (Veiligheid en Sekuriteit), Mosiuoa Lekota (Verdediging), mee. Lulu Xingwana (Landbou en Grondsake), Thoko Didiza (Openbare Werke), dr. Nkosazana Zuma (Buitelandse Sake), en me. Nosiviwe Mapisa-Nqakula (Binnelandse Sake).

Die geding hou verband met geskiedkundige gevalle van grensskendings uit Lesotho wat diefstal en veiligheidskwessies insluit.

Steytler betreur die optrede, maar sê dit is onvermydelik as die gemeenskap meen dat die staat gebrekkig bly en onwillig blyk om sy voogdyskap van die demokrasie uit te voer.
Hy het die Regering gewaarsku dat Vrystaat Landbou se vasberadenheid om daadwerklik op te tree, nie onderskat moet word nie.

Hy sê dat die beginsels wat na verwagting in die geding gevestig sal word, ook toegepas sal kan word as Vrystaat Landbou 'n klasaksie teen die staat van stapel stuur om die vlaag van moorde in landelike gemeenskappe te probeer keer. Die klasaksie sou daarop gemik wees om die "moord en doodslag in die landelike gebiede, ongeag van kleur" om te keer.

2 Augustus 2007