Liggingsdifferensiaal styg

Die termynbeurs op die JSE (Safex) het bekend gemaak dat die liggingsdifferensiaal vir koring in die Wes-Kaap van R310 per ton tot R420 per ton verhoog. Die nuwe tarief sal vanaf 1 Oktober vanjaar tot 30 September volgende jaar geld.

Die netto verhoging jaar op jaar is 28,75% tot 33,4% - na gelang van die persentasie produkte wat per pad of spoor van silo's af vervoer word. Volgens 'n Safex-kennisgewing is die nuwe koers bepaal deur die koers vir mielies in ag te neem en ook aanpassings te maak in ooreenstemming met die verhoging in vervoerkoste die afgelope ses maande.

Die verhoging in brandstofkoste vanaf Februarie tot Julie is oorweeg. Dit het 'n verhoging van 20% in die padvervoerkoers teweeg gebring en 'n verdere verhoging van 3% in die spoorvervoerkoers.

Mnr. D.F. Fyfer, hoof van PSG Kommoditeite, sê die groot vraag na vervoer tydens oestyd verwring die prys verder. 'n Tekort aan trokke veroorsaak dat die een met die hoogste bod vervoer kry en 'n ander nie. Daar word dan tot R470 per ton betaal net om vervoer te bekom.

Volgens Safex is soortgelyke produksiefaktore in ag geneem as wat vroeër vanjaar gebruik is om die liggingsdifferensiaal vir mielies te bepaal. Die differensiaal vir padvervoer het met 16,5% verhoog en vir spoorvervoer met 18%.

Die werklike verhoging vir elke silo word bereken uit die verhouding van produkte wat per pad en spoor vervoer word.

Landbouweekblad, 15 Augustus 2008