LNR se baas vort

Die landbou se belangrikste navorsingsorganisasie is sy kontroversiële hoof kwyt.

Dr. Nthoana Tau-Mzamane, uitvoerende hoof en voorsitter van die Landbounavorsingsraad (LNR), se kontrak het einde Mei verstryk. Sy was sedert 2001 in dié pos.Die organisasie is nou op soek na 'n nuwe uitvoerende hoof. Die LNR se raad maak aanbevelings, maar slegs die Minister van Landbou en Grondsake kan die aanstelling maak.

Mnr. Thero Setiloane, die LNR-raad se voorsitter, wou nie aan Landbouweekblad bevestig of Tau-Mzamane vir nóg 'n termyn genader is nie en of sy nie weer vir die pos oorweeg is nie. Hy het wel gesê die pos is geadverteer en dit het Tau-Mzamane vry gestaan om aansoek te doen.

Volgens hom was Tau-Mzamane se grootste bydrae "finansiële stabilisering" toe sy oorgeneem het. "Die organisasie was tegnies insolvent toe sy oorgeneem het. Sy het beslis verskeie dinge vermag, maar haar grootste bydrae was om die LNR weer op koers te kry. Voorheen was daar feitlik geen beheer nie en mense het links en regs geld bestee. Sy het ook heelwat gedoen om korporatiewe beheer te versterk," het Setiloane gesê.

Landbouweekblad het die laaste paar jaar wyd berig oor growwe bewerings van swak korporatiewe beheer by dié instelling. Dié bewerings was gegrond op ondersoeke na bestuursaspekte wat, volgens verslae, ernstig te kort geskiet het. Só is 'n konsultant, Morailane Morailane, aangestel sonder enige werksbeskrywing. Hy is ruim vergoed en het ook 'n salarisverhoging geniet wat vir permanente personeel bedoel was. Hoewel 'n verslag dié ongerymdheid uitgewys het, is Morailane later aangestel in Tau-Mzamane se kantoor as uitvoerende assistent.

Een van die laaste sake waarvoor Tau-Mzamane in die nuus was, was toe sy haar raad by die Kommissie vir Versoening, Bemiddeling en Arbitrasie (KVBA) verkla omdat sy na bewering ontevrede was oor 'n salarisverhoging van sowat 30 %. Die KVBA het nie op die saak gereageer nie en haar aanbeveel om dit na die Arbeidshof te neem.

Setiloane sê 'n nuwe uitvoerende hoof sal "in die volgende paar maande" aangekondig word. Hy sê hy sal die proses oorsien waarna hy self as voorsitter, ná ses jaar op die raad, sal uittree.

16 Junie 2006