Manuel looi EU oor subsidies

Mnr. Trevor Manuel, Minister van Finansies, het vir Suid-Afrika se boere 'n lansie gebreek toe hy die Europese Unie (EU) op eie bodem daarvan beskuldig het dat hy Suid-Afrika, en ook die vasteland, se boere arm hou deur die landbousubsidies wat Europese boere kry.

Luidens internasionale persberigte het Manuel in die Belgiese hoofstad Brussels spesifiek verwys na die EU se landboubeleid, die "Common Agricultural Policy" (CAP). Volgens hom vergerge dié beleid net die "groot ongelykheid" tussen Europa en Afrika.

"Ek het nog nie 'n politieke leier in Europa raakgeloop wat dit kan regverdig nie. Met die verkiesing in gedagte en oënskynlike mag wat boere het om chaos te veroorsaak, smelt alle weerstand. Ons plan op lang termyn is om die handelsversteurende uitwerking van die CAP te beëindig en om werklike beter marktoegang te bied," het Manuel luidens berigte gesê.

Manuel se uitsprake volg op stellings van mnr. Membathisi Mdladlana, Minister van Arbeid, dat die Regering verkies om te veg vir gelyke handel met ryk lande as om plaaslike maatreëls in te stel vir verhoogde beskerming. Mdladlana het dié stelling vroeër gemaak op 'n seremonie van die opkomende rooivleisprodusente-organisasie (Nerpo).

Intussen het pres. George W. Bush van Amerika sy departement van landbou en die Amerikaanse boere bygekom in sy poging om die snoeiskêr in te lê met die Amerikaanse begroting van $2,57 triljoen.

Daar word aan altesame 150 regeringsprojekte gesny wat 'n vermindering van subsidies aan boere insluit. In sy begroting wat hy by die Amerikaanse kongres ingedien het, sonder hy die inkorting van landbousudsidies (9,6 %) en natuurbewaring (5,6 %) uit.

Volgens Sapa-AP het Bush gesê die regering betaal tot $360 000 per jaar aan individuele boere en dat dit nie só kan voortgaan nie. Hy het gesê die vermindering in landbou-subsidies kan vir belastingbetalers 'n besparing van $1,2 miljard oor die volgende tien jaar beteken.

Die begrotings sal na verwagting 'n hewige debat in die kongres ontketen.

18 Februarie 2005