Distell se geldjaar-resultate dui aan dat hy te midde van moeilike ekonomiese tye sy man kon staan.

Luidens ‘n verklaring het die groep se omset jaar-op-jaar ‘n toename van 4,4% getoon tot R12,3 miljard. Dié groei is bewerkstellig ten spyte van sleutelmarkte wat geweldige moeilike tye ondervind het, asook die nadelige uitwerking van die sterk rand op die mark.

Die groep se verkoopsvolume het met 2,4% gestyg. Bedryfsuitgawes het met 4,6% toegeneem, terwyl bedryfswins met 3,1% gestyg het. Die netto-bedryfsmarge het, in ooreenstemming met die syfers van 2010, met 0,1% tot 11,7% gedaal.

Die wesensverdienste per aandeel het met 1,6% tot 476,8c toegeneem, en oor ‘n tydperk van sewe jaar het dit met 14,6% gegroei.

Produkportefeulje
Mnr. Jan Scannell, besturende ditekteur van Distell, sê marges vir sekere produkkategorieë het verbeter, maar prestasie “is in die wiele gery” deur swak ekonomiese groei en die nadelige wisselkoers.

“Ons is tot ’n mate teen die ongunstige handelstoestande beskerm deur ons veelsydige produkportefeulje en die wye reeks pryspunte waarteen ons produkte verkoop, asook die verskeidenheid van markte waarin ons handel dryf.

"Die ontwikkelde markte, veral Europa en Noord-Amerika, was veral taai, maar ons het baie bemoedigende groei in ontluikende ekonomieë getoon, veral Afrika, Latyns-Amerika en dele van Asië-Stille Oseaan,” aldus Scannell.

25 Augustus 2011