IDC belê meeste nog

Die Nywerheidsontwikkelingskorporasie (IDC) het in die afgelope boekjaar R8,4 miljard se beleggingsprojekte goedgekeur – die meeste nog.

Die IDC het sy finansiële resultate vir die jaar geëindig 31 Maart 2011 onlangs bekend gemaak. Dit is die hoogste goedkeuringsyfer nog, het mnr. Geoffrey Qhena, uitvoerende hoof van die IDC, gesê tydens die bekendmaking van dié syfers by die ontwikkelaar se hoofkantoor in Sandton.

Hoewel slegs 7% persent van dié finansiering regstreeks aan die primêre landbousektor toegeken is, is dit die meeste wat dié sektor nog ontvang het. Die IDC se blootstelling aan die landbou is verhoog vanweë dié sektor se vermoë om werk te skep, sê Qhena.

Vervaardiging ontvang 27%
Die vervaardigingsektor, insluitend landbouvervaardiging, het 27% van die finansiering ontvang. Dit is die meeste wat enige sektor ontvang het, gevolg deur infrastruktuur (16%), die mynbouwaardeketting (16%), groen ekonomie (13%), Afrika-ontwikkeling (10%) en landbou (7%). Biobrandstof word onder die groen ekonomie geag.

Qhena sê die gebiede wat stewige finansiering ontvang het, is gebiede wat ooreenstem met die regering se Nasionale Groeiplan.

Die gesamentlike finansiering in alle sektore sal na verwagting lei tot 19 650 nuwe, permanente poste. Sukkelende maatskappye wat bystand van die IDC ontvang het, het daartoe gelei dat 11 650 poste wat verlore sou gaan, behoue gebly het.

Die maatskappy hoop dat 8 100 poste onregstreeks deur dié beleggings geskep sal word. In die vorige jaar het die maatskappy se beleggings 25 000 poste geskep.

Die groep se omset het met 15% gestyg vanaf R7,785 miljard in 2009/’10 tot R8,965 miljard in 2010/’11. Dit kom neer op ’n totale voorbelaste wins van R2 918 miljoen, wat 42% beter is as die vorige jaar se syfer van R2 048 miljoen.
Foskor het ’n groot bydrae tot die gunstige resultate gelewer.

4 Julie 2011