Landbou-ondernemings verenig

Drie landbou-ondernemings, wat Farmsecure Tegnologies (Edms) Bpk insluit, het ’n ooreenkoms bereik om ’n nuwe onderneming te stig. Luidens ’n verklaring sal die nuwe entiteit, as ’n filiaal van Farmsecure Tegnologies, ná afhandeling van die transaksie ’n meerderheidsaandeel in Terason (Edms.) Bpk. en Technichem Oesbeskerming (Edms.) Bpk. (die ander twee ondernemings) besit.

Die handelsmerk, verkoopspersoneel, tegniese adviseurs, bestuur- en bedryfstelsels van Terason en Technichem bly behoue soos dit tans is. Vir boere wat kliënte van die twee ondernemings is, gaan sake dus soos gewoonlik voort.

Bydrae tot voedselsekerheid

Mnr. Schalk Lubbe, hoofbestuurder van Farmsecure Tegnologies, sê hulle is opgewonde oor die samewerking wat tussen die drie ondernemings gaan bestaan: “As ’n groep het Farmsecure die visie om ’n betekenisvolle bydraes tot die wêreld se voedselsekerheid te lewer deur die skepping van volhoubare en winsgewende landbou-waardekettings.

"Die maatskappy glo nie daarin om te domineer in ’n segment of mark nie, maar wil graag ’n beduidende rol in totale landbou-waardekettings speel,”

Mnre. Rudolph Geldenhuys, die hoofbestuurder van Terason, en Boet Wienand, die besturende direkteur van Technichem, meen die sinergie van die ondernemings sal geleenthede vir groei skep en hulle reg posisioneer vir die toekoms.

4 April 2011