‘Resessie draai, maar landbou knyp’

Die meeste ander dele van die Suid-Afrikaanse ekonomie herstel saam met die internasionale ekonomie, maar die landbou verkeer steeds onder effense druk, het mnr. Mike Schüssler, ekonoom van Economists.co.za, op Landbouweekblad en AMT se vooruitskouingskonferensie in Pretoria gesê.

Die weer is ‘n groot rede daarvoor.

“Ek is in die algemeen sleg met landbouvoorspellings, want ‘n mens moet die weer in gedagte hou. Boonop is daar ‘n El Niño-verskynsel op pad.”

Suid-Afrikaners het reeds weer meer begin bestee op kleiner luukshede, soos kitskos en kosmetiek. Dit sal egter steeds ‘n ruk duur voor die meubel-, motor- en huismark sal herstel. “Ek vermoed goeie trekker- en stroperwinskopies behoort minstens tot einde vanjaar nog daar te wees,” het hy gesê.

Dit is egter optimisties om te dink dat die huismark binnekort sal herstel. Schüssler sê onderskeid is nodig tussen huispryse en die prys vir landbougrond, aangesien laasgenoemde gebruik word om ‘n inkomste mee te genereer. “Die prys sal styg indien jy ‘n wins daaruit kan maak.”

Wat landboukommoditeite betref, is suikerpryse tans op ‘n rekordhoogtepunt. Schüssler meen dit is nie ‘n slegte tyd om in hierdie bedryf te wees nie.

Oor die lae mielieprys sê hy: “Ek vermoed dit behoort te draai. Indien die El Niño-verskynsel boere tref, kan die mieliepryse blitsig vanaf uitvoer- na invoerpariteit spring.”

1 Oktober 2009