Safex: Riskantste formele mark in die wêreld

Die verhandeling van Safex-kontrakte word saam met die sakebedrywighede van die lemoensapbedryf in Amerika as die onstuimigste amptelik verhandelde markte ter wêreld gereken.

Mnr. Pieter Esterhuysen, hoof van graan by Suidwes Landbou, het op Agri Noordwes se jongboerkonferensie gesê dié feit blyk uit 'n ondersoek in Amerika. Hy sê soms is daar goeie boere wat dit nie maak nie omdat hulle nie die regte markbesluite neem nie.

"Min of meer die helfte van jong boere is regstreeks of onregstreeks by Safex betrokke. Hulle moet weet dat hul geld in die mees riskante formele mark ter wêreld belê is." Hy sê aan die opsiekant kan die waarde van dit wat op Safex belê word elke jaar óf verdubbel óf met die helfte gesny word. Dit vergelyk met eiendom wat 'n mens teen R5 000 koop en dan in dieselfde jaar vir óf R2 500 óf R10 000 kan verkoop.

Esterhuysen sê die graanmark in Chicago kan dalk een of twee keer per jaar die limiet bereik wat gestel word om kwaai markbeweging te beperk. "Op Safex is die limiete in Januarie en Februarie in 18 werksdae 13 keer bereik.

"In vier dae het die mark met R220 gestyg. Teen die aanvanklike pryse waarteen boere gekontrakteer het, beteken dit meer as 20 % waardeverhoging in die onderliggende bate in vier werksdae. In die afgelope seisoen het ons reeds 'n prysbeweging van R1 000 in die intrinsieke waarde van die kommoditeit gesien.

"As dit in die finansiële markte plaasvind, skryf mense boeke daaroor. Handelaars, adviseurs en beleggers sny hul polse, spring van hoë geboue af en ry in pale vas. Boere moet egter elke dag daarmee saamleef."

Hy sê Suidwes Landbou het ontsag vir boere se waagmoed en durf en bewonder hulle vir feit dat hulle sukses behaal te midde van ongelooflike uitdagings.

Landbouweekblad, 27 April 2007