Senwes se resultate geprys

Senwes se prestasies en finansiële resultate van die afgelope boekjaar is deur direkteure en aandeelhouers geprys.

Luidens ’n verklaring is die maatskappy se dividend van 25c per aandeel onlangs op ’n vergadering goedgekeur. Dié dividend sal op 9 September 2011 aan aandeelhouers betaal word.

Mnr. Japie Grobler, die voorsitter van die direksie, en mnr. Francois Strydom, die besturende ditrekteur, het aandeelhouers op die vergadering ingelig oor die uitbreidingsgeleenthede wat die maatskappy die afgelope jaar benut het. Hulle het die vergadering ook gewys op die groei wat bereik is.

Uitdagings
Die uitdagings wat in die tydperk ervaar is en die wisselvallige ekonomiese omgewing waarbinne die maatskappy en sy boere hulle tans bevind, is ook aan aandeelhouers uitgewys. Volgens die maatskappy het die aandeelhouers goed gereageer op die resulatate.

Op die vergadering, waar stemgeregtigdes met 86% verteenwoordig was, is Grobler en mnr. Danie Minnaar, weer as onderskeidelik die voorsitter en ondervoorsitter van die direksie aangewys.

Mnre. Dries Kruger en Danie Minnaar is as direkteure van die maatskappy herkies, terwyl Jaco Minnaar van Hennenman ook as direkteur gekies is. Me. Zarina Bassa en mnr. Steve Booysen is as nie-uitvoerende direkteure bekragtig. 

1 September 2011