Vertroue in landbousake styg

Die Landboubesigheidskamer (LBK) se landbousakevertroue-indeks toon vir die eerste kwartaal van 2007 'n 23,90% toename in sakevertroue in vergelyking met dieselfde kwartaal van 2006.

Hierdie toename volg op die 21,77% toename in die sakevertroue van landboubesighede in Suid-Afrika in die vierde kwartaal van 2006.

Me. Lindie Botha van die LBK en opsteller van die indeks, sê dat sewe uit die tien faktore wat gebruik word om die indeks op te stel, gunstige neigings toon, met die sterkste drywers die verwagte toenames in die omset, netto bedryfsinkomste en die markaandeel van landboubesighede.

Volgens Botha bly kapitale investering en volume-uitvoere steeds positief, wat ook korreleer met landboubesighede se verwagting dat die relatiewe sterk ekonomiese groei in Suid-Afrika gaan voortduur.

LBK se landbousakevertroue-indeks (sub-indekse jaar op jaar beweging):

Omset: Positief

Netto bedryfsinkomste: Positief

Indiensname: Dieselfde

Kapitaal investering: Positief

Ekonomiese groei in Suid-Afrika: Positief

Volume uitvoere: Positief

Algemene landboutoestande: Positief

Markaandeel van die besigheid: Positief

Debiteurevoorsiening vir slegte skuld: Dieselfde

Finansieringskoste: Negatief

Volgens dr. Tobias Doyer, hoof uitvoerende beamte van die LBK, is landboubesighede in sekere dele van die land baie bekommerd oor die moontlike droogtetoestande wat veral somergraanboere regstreeks kan benadeel.

"Daar is ook sekere landboubedrywe, byvoorbeeld die wyn- en volstruisbedryf waar vertroue, as gevolg van institutionele redes, relatief laag is, maar in vergelyking met die afgelope twee tot drie jaar is die relatief positiewe sakevertroue baie reflekterend op die werklike drag van sake. Landboubesighede ervaar in 2007, relatief tot die afgelope twee jaar, duidelike gunstige neigings t.o.v. produksievolumes, produkpryse en uitvoere", aldus Doyer.

27 Februarie 2007