Wisselkoers karnuffel KWV

Die KWV. Foto: AMELIA GENIS

Die sterk rand het KWV se resultate vir die eerste ses maande van die geldjaar lelik geboelie en die maatskappy toon ‘n verlies van R7,2 miljoen in die kern wyn- en brandewynbesigheid.

Volgens mnr. Thys Loubser, hoofbestuurder van die KWV, het ‘n doelbewuste besluit om verkooppryse van nie-winsgewende produkte in die Verenigde Koninkryk (VK) op te stoot, tot ‘n dramatiese daling van verkope van meer as 2 miljoen liter in dié mark gelei.

“Hoewel dit jammer is, is ons nie alleen nie. ‘n Groot hoeveelheid Suid-Afrikaanse manne moes totaal onttrek uit die VK. Ons bemark steeds die Pearly Bay-handelsmerk in die VK. As die wisselkoers dus draai, is ons handelsmerk steeds gevestig.” Loubser sê ook planne is in plek om die KWV minder afhanklik van die wisselkoers te maak.

“As dit nie vir die wisselkoers was nie, het ons baie naby aan dieselfde resultate as verlede jaar gekom. Maar ek kruip nie daaragter weg nie,” sê hy. 

Die maatskappy het ook ‘n afname van R29,5 miljoen in sy bedryfswins getoon. Wesensverdienste het op R5,8 miljoen (8,4 sent per aandeel) te staan gekom. Dit is ‘n afname van 80% van die R28,5 miljoen vir die vergelykende vorige ses maande. Dié klein wins word aan die verkoop van kleiner bates en rente wat op die maatskappy se kontantbalans verdien is, toegeskryf.

Loubser is positief oor die toekoms van die maatskappy. Onlangse korporatiewe aksie by die KWV was ontwrigtend vir die bestuur en werknemers.

“Ons het vir die eerste keer die regte en ‘n ordentlike span in plek. Ons het ook goeie planne in plek. Ons het die laaste jaar baie hard gewerk met ons handelsmerkdirekteure wat ‘n spesiale fokus op ons handelsmerke sal sit. Die proses het tyd geneem, maar nou is ons gereed om die maksimum uit ons bestaande handelsmerke te haal.”

Lees die volgende uitgawe van Landbouweekblad vir meer.

23 Februarie 2011