Zeder se inkomste groei met 27%

Zeder se inkomste het in die afgelope boekjaar tot Februarie 2011 met 27,2% tot R246 miljoen gegroei. Luidens ’n verklaring het die maatskappy, wat spesifiek op belegging in die landbou fokus, se wesensverdienste per aandeel met 14,8% toegeneem tot 27,1c per aandeel.

’n Finale dividend van 4c per aandeel is vir die tydperk onder bespreking verklaar. Die toegeskryfde verdienste per aandeel het met 89,3% tot 26,5c per aandeel gestyg, wat grootliks aan die verkoop van Zeder se aandele in KWV toegeskryf kan word. 

Mnr. Antonie Jacobs, hoof uitvoerende beampte van Zeder, sê hy is tevrede met die prestasie van die maatskappye wat binne hul portefeulje val. Kaap Agri en Capevin maak 78% van Zeder se beleggingsportefeulje uit.

Boete

Zeder sê die boete van R855 miljoen wat Pioneer Foods weens nie-mededingende praktyke moes betaal, het ’n ongunstige impak van R40,5 miljoen op Zeder se inkomste en wins gehad. Kaap Agri besit ’n 31,2%-aandeel in Pioneer Foods, en Zeder besit op sy beurt weer aandele in Kaap Agri.

Zeder het sy aandeel in Kaap Agri die afgelope jaar van 41,3% tot 43,9% verhoog.

Die maatskappy sê hy gaan in die huidige boekjaar voortgaan om in die landbou en voedselsektore te belê, en hy gaan ook daarop fokus om na nuwe beleggingsmoontlikhede te soek.

12 April 2011