Megageld vir megareservaat

Nagenoeg R17 miljoen gaan oor die volgende twee en 'n half jaar in die Baviaanskloof se mega-natuurreservaat belê word om toerisme te bevorder.

Die projekte wat deur die Departement van Omgewingsake en Toerisme en 'n trust van die Nasionale Lotery gefinansier word, sal onder meer gebruik word om 'n Wêrelderfenis-inligtingsentrum by Komdomo, die oostelike ingang, op te rig.

Mnr. Angus Tanner, koördineerder van die projek, sê ander projekte sluit die instandhouding van paaie, die verwydering van draadheinings en rommel in. Plaaslike inwoners sal ook as gidse opgelei word.

Volgens Tanner sal ál sewe ingangspaaie na die kloof verbeter word. "Daar is egter nie genoeg geld om die paaie te gruis nie, maar noodsaaklike herstelwerk op die dele wat in 'n swak toestand is, sal gedoen word."

Afgesien van die opgradering van oornaggeriewe by Bergplaas en Komdomo sal verskillende staproetes, wat die Otter- en Dolfynwandelpaaie sal komplementeer, mettertyd ontwikkel word. "Al die projekte sal tydelike werksgeleenthede vir die plaaslike inwoners skep.

Die mikpunt is om 'n volhoubare ekonomie te skep wat op omgewingsbewaring geskoei is en al die inwoners van die gebied sal bevoordeel," het Tanner bygevoeg.

4 Februarie 2005