Melamien in SA kos

Die Nasionale Verbruikersforum het spore van die gevaarlike chemikalie melamien in 'n Suid-Afrikaanse produk bespeur.

Die forum het 19 verskillende soorte lekkergoed, sjokolade en graankosse in Kaapstad getoets. Een van die produkte het spore van die chemikalie bevat, luidens die SABC.

Mnr. Thami Bulani, hoof van die Verbruikersforum, sê Suid-Afrikaanse verbruikers het niks om oor bekommerd te wees nie. "Daar was een positiewe resultaat. Die vlakke is nie so hoog nie, maar ons moet eers met die betrokke maatskappy praat en die resultate bespreek voordat ons verdere inligting bekend kan maak," het hy gesê.

Melamien is 'n industriële chemikalie wat in die vervaardiging van plastiek en gom gebruik word. 'n Onlangse skandaal in China het die gevare van dié stof in voedsel na vore gebring nadat honderde babas siek geword het weens melamien in melk.

Die chemikalie word gebruik om die proteïenvlakke op te stoot van melk waarby water gevoeg is.

Bron:

Fin24.com

24 Oktober 2008