'Melkbedryf kry invoer-druk'

Die Suid-Afrikaanse melkbedryf ervaar tans ernstige druk van buitelandse mededinging. Meer as 60 % van alle melkprodukte wat plaaslik geproduseer word, is aan regstreekse buitelandse mededinging onderworpe.

Volgens mnr. Alwyn Kraamwinkel, hoof vir die Suid-Afrikaanse Melkprosesseerdersorganisasie (Sampro), is dit veral die invoerprys van melk met 'n lang raklewe, kaas en verskeie soorte melkpoeier wat 'n regstreekse invloed het. Hy het gereageer ná die Kommissie vir Internasionale Handelsadministrasie (ITAC) twee weke gelede bekend gemaak het dat die Regering gaan wegdoen met 'n tussentydse invoermaatreël op kaas uit Ierland.

'n Teenstortingsheffing van 48 % op kaas van die Ierse suiwelraad en 'n heffing van 60,2 % op ander kaas uit Ierland het sedert Februarie gegeld. Dit is ingestel omdat gemeen is die plaaslike bedryf ly skade omdat Ierse kaas vir tot soveel as 60 % goedkoper in Suid-Afrika aangebied word as in Ierland. Die bedryf het verwag 'n teenstortingsmaatreël sal vandeesmaand vir vyf jaar ingestel word, maar die ITAC meen daar is geen verband tussen die storting van die kaas en die skade aan die plaaslike bedryf nie.

Mnr. Francois Dubbelman, handelskenner van International Trade Services en plaaslik die Ierse suiwelraad se verteenwoordig in die saak, sê dit is te vroeg vir die Iere om te besluit of hulle weer die Suid-Afrikaanse mark sal betree. Dubbelman sê die plaaslike mark sal eers weer gevestig moet word. Hy sê die Ierse suiwelraad het die ITAC se besluit verwelkom.

Kraamwinkel sê Sampro se ramings oor die verwagte in- en uitvoer vir vanjaar (wat op syfers van die Suid-Afrikaanse Inkomstediens gebaseer is) toon die invoer in 2005 is hoër as die invoer in 2004. Daarby is die beraamde invoer vir 2005 "dramaties hoër as die uitvoer'', terwyl minder melkprodukte verlede jaar ingevoer is as wat uitgevoer is.

29 Julie 2005