Melkbeesteling in kollig

Melkaantekening is die vernaamste grondslag waarop melkbeesteling reeds vir meer as 'n eeu gevestig is. Dit is die vertrekpunt van alle pogings wat daarop gerig is om produksie in melkkuddes, nasionaal en internasionaal, geneties te verbeter.

Stoetveeteling en kunsmatige inseminasie is die twee ander belangrike komponente wat by die melkbeesteeltbedryf betrokke is.

Hierdie drie konsepte is breedvoerig in 'n gedenklesing by die Universiteit van Stellenbosch deur dr. Jan H. Hofmeyr, afgetrede direkteur van die destydse navorsingsinstituut vir Vee- en Suiwelkunde, Irene (tans die LNR se Instituut vir Diereverbetering en Dierevoeding en -produkte) bespreek.

Die lesing, "Strukturele veranderings in die melkbeesteeltbedryf" is onlangs gepubliseer en bied 'n oorsig oor die geskiedenis van melkbeesteling, internasionaal, sowel as in Suid-Afrika. Die rol wat internasionale strukture, soos Interbull, ICAR en Intergis, in die genetiese vordering van die melkbeesbedryf gespeel het, en steeds speel, word onder meer daarin bespreek.

Gebinde glanspapier-eksemplare van die Vierde Steenberg Gedenklesing is gratis beskikbaar by die universiteit se departement veekundige wetenskappe.

Dié publikasie verskyn in die tiende herdenkingsjaar van die dood van Hendrik Johannes Steenberg wat in 1995 R1 miljoen uit sy boedel aan die US se fakulteit Landbou- en Bosbouwetenskap bemaak het as die Steenberg-trust vir veeteeltnavorsing en studiebeurse aan verdienstelike studente.

Navrae: Prof. Chrisjan Cruywagen, tel. 021 808 4746 of e-pos cwc@sun.ac.za.

19 Augustus 2005