Melkinvoere vreet aan boere

Melkinvoere is tans op die hoogste vlak ooit en Suid-Afrikaanse melkboere is ontstoke omdat melkkopers in 2007 gesmeek het dat hulle produksie opstoot om 'n melktekort te verlig. Die tekort was 'n resultaat van vele melkboere se besluit om dié bedryf te verlaat.

Volgens die voorsitter van die Oos-Kaapse Melkproduseerdersorganisasie, mnr. Freddie van Zyl, word sowat 14% van Suid-Afrika se melk ingevoer. Die meerderheid hiervan kom van Argentinië, Uruguay of Brasilië en die hoof van die Suid-Afrikaanse Melkproduseerdersorganisasie (Sampro), mnr. Alwyn Kraamwinkel, meen dat sowat 15 000 ton melk van elders - veral UHT-melk - die pad na Suid-Afrikaanse winkelrakke vind.

Dalende internasionale melkpryse en verhoogde produksie deur Suid-Afrikaanse melkboere nadat melkkopers verlede jaar gevra het dat hulle meer melk produseer, het veroorsaak dat boere nou sowat 30 sent minder per liter melk ontvang.

Kundiges meen dat die laer pryse wat boere ontvang nie die prys van melk in winkels sal verlaag nie en kanse is goed dat meer boere die melkbedryf sal verlaat.

Me. Lisa Carter, 'n melkboer van Greenbushes, sê "dit is baie geld en ons sal R28 000 minder per maand vir ons melk kry. Verlede jaar het kopers ons gesmeek om meer te produseer, so boere het meer koeie aangekoop net om uit te vind dat kopers nou weer die pryse verlaag en melk elders koop. Boere gaan hul plase hieroor verloor".

8 Julie 2008