Boer sukkel om by BV aan te sluit

‘n Wes-Kaapse groenteboer sê sy plaaslike landbouverenging kan gaan doppies blaas nadat hy twee jaar lank vergderings bygewoon het, maar nie genooi is om aan te sluit nie.

Mnr. Tyron Williams het deelgeneem aan ‘n debat oor die georganiseerde landbou op die gespreksforum. “So, al wil ons baie graag betrokke raak by die georganiseerde landbou, weet ons waar ons nie welkom is nie en ek sien dus ook nie kans om my tyd te mors nie.”

Dié debat oor die georganiseerde landbou het ontstaan nadat berig is dat Agri Mpumalanga om vrywillig likwidasie aansoek gedoen het. Hier is van die skrywes op die gespreksforum daaroor:

Andre Geldenhuys skryf:
Sien nou uit 'n mediaverklaring van die TLU dat Agri Mpumalanga in vrywillige likwidasie gaan. Wat 'n hartseerdag dat so-iets moet gebeur op 'n tydstip in ons geskiedenis waar ons as boere die georganiseerde landbou so nodig het, of dit nou AgriSA/TLU of wie ookal is.
Wil die vraag vra sonder enige motiewe of bybedoelings of dat ek enige navorsing daaroor gedoen het of betekenisvolle kennis het: Is die ketting tussen ‘n lid van die georganiseerde landbou en die topstruktuur nie té lank nie? Is die belange van die verskillende streke só verskillend dat provinsiale strukture (en die koste om hulle te onderhou) werklik nodig is?

Speenkalf skryf:
Ek sal uiters graag wil sien dat die forum debat voer oor hierdie punt wat jy hier aanroer. Ek sit sommer hier en dink aan dinge wat nie vir my sin maak nie.
Dit gaan nie net oor die provinsiale strukture nie maar oor die bestaan van drie organisasies in die landbou Agri SA, TLU, Nafu.
Verder moet alle ander bedryfsorganisasies soos, MPO, RPO, Graan SA noem hulle maar op by beide Agri en TLU affilieer alles jaag kostes op.
As ek kyk na die organisasies se missie is daar geen wenslike verskil nie.
Kommunikasie is nie wat dit veronderstel is om te wees nie...ons kry verskillende seine van verskillende organisasies.

Wat my meer as enige iets pla is die feit dat ons nie hier op hierdie forum geen reaksie kry oor Georganiseerde Landbou nie.
Dit laat my wonder is ons so onbetrokke omdat ons bang is ons kan so ekstra bietjie tyd moet opoffer. Is dit altyd die ander ouens wat hulle tyd moet opoffer: Die ander ouens wat die saak moet dryf.
Is ons werklik so ver van die topbestuur af...of doen ons dit uitvry wil deur ons te weerhou daarvan om ons opinie te lig op 'n openbare forum.
Ons kan vinnig vir Landbouweekblad 'n briefie in die pos goei en kla dat X en Y te veel by die Minsters en Prez lê.. maar van bydrae lewer, aikona.
Ek het nie 'n saak aan watter een van die Organisasies mense behoort nie, feite is ons moet begin praat oor die goed. Dit affekteer elke ou wat hom/haarself as 'n landbouer sien binne Suid-Afrika.
As ons net kyk wat dit ons finansieel uit die sakke jaag om twee organisasies in stand te hou ens moet ons regtig begin wonder is dit sinvol...

Tyron Williams skryf:
Ons het probeer aansluit by Agri Wes-Kaap, maar as individu moes ons by ons plaaslike landbouvereniging aansluit en daardeur lid word van Agri Wes-Kaap. In ons geval is ons klein groenteboere (alhoewel sekeres sal se dat 9 ha intensiewe losblaar slaai, of in Engels "fancy leaf lettuce/designer lettuce" nie so klein is nie). Elk geval, ons plaaslike landbouvereniging is verteenwoordigend van kommersiële koring en melkboere. Nou om aan die geagte menere se vereniging te behoort, moes ons eers ‘n paar vergaderings bywoon totdat een van hulle besluit het dit is tyd om ons te nomineer om lid te word van hulle vereniging. Ná twee jaar wat ons meer vergaderings bygewoon het as hul eie lede en nog steeds nie genomineer is nie, het ons eenvoudig besluit hulle kan loop doppies blaas. (Ironies was ek op skool met meeste van die lede, so ek is nie ‘n vreemdeling nie, ek boer maar net met groente.)

Ek is nie lui om my tyd op te offer nie. Ek is voorsitter van ons inwonersvereniging, dien in twee kommitees van twee skietklubs waaraan ek behoort, is ‘n verteenwoordiger van ons gemeenskap op die plaaslike Wyksforum van die Munisipaliteit en is lid van die Moniteringskommitee op die gebruik van Rioolslyk. Maar ons is nie waardig vir die plaaslike landbouvereniging nie.

Soos ek nou die dag vir ‘n ou gese het toe hy vir my se ons is eintlik kleintjies: As mens kyk na inkomste per ha, maak van die ouens R5000 tot R7000 per ha op hul grond met koring per jaar. Ek draai tussen R20 000 en R30 000 om per ha per maand! Maar ons is nie goed genoeg nie.

So, al wil ons baie graag betrokke raak met die georganiseerde landbou, weet ons waar ons nie welkom is nie en ek sien dus ook nie kans om my tyd te mors nie. Ons sal dus net op ons eie aangaan. Tragies is daar in ons area drie groterige groenteboere, vier intensiewe tonnelboere en seker omtrent ses of sewe kwekerye. Ons kan nou probeer om ‘n vereniging van ons eie aan die gang te kry, maar met die hoeveelheid rompslomp wat dit inhou om by Agri Wes-Kaap as vereniging te stig, konsentreer ek eerder op my boerdery.

Andre Geldenhuys skryf:
Dis vir my skrikwekkend om jou skrywe te moet lees, en as dit waar is (en ek het geen rede om jou nie te glo nie!) is dit 'n klad op die naam van jou plaaslike landbouvereniging en ek glo dat die bestuur deur Agri Wes-Kaap aangespreek behoort te word!! Ekself behoort aan die Volop Landbouvereniging wat affilieer by Agri Noord-Kaap en ons nooi enige nuwe boer van wie ons in ons omgewing hoor onmiddelik persoonlik uit om by ons aan te sluit. En al is jy nie lid nie, is jy nog steeds welkom om die vergaderings as 'n waarnemer by te woon - jy kan net nie stem oor enige aangeleentheid nie.
AgriSA verteenwoordig die belange van KOMMERSIëLE boere, of jy nou groot of klein of wit, swart of pienk of wat ookal is. In tye waar ons as landbouers moet saamstaan kan ons nie bekostig om een enkele potensiële lid te verloor nie.

29 Julie 2010