Skape: Hoe om meer geld te maak

Dit is ongelooflik hoe gebrekkig mense se kennis is van die doel en funksie van skaaprasse.
Baie boere skeep die teling en verbetering van hulle kuddes baie af en verspeel hulle kanse om geld te maak veral met die huidige goeie pryse van skaap- en lamvleis.
Te min aandag word gegee aan 2 van die belangrikste komponente naamlik die gebruik van ordentlike ramme en kruisteling(basterkrag).
Foute wat baie kudde boere maak is om sommer 'n paar van hulle eie ramlammers te hou of ramme by 'n nie erkende stoetteler te koop.
Beide het tot gevolg dat daar geen verbetering in hulle kudde is nie en dit ook lei tot probleme soos swak groei, lae speengewig,inteling,lae lam- en speenpresentasies asook swak besetting.
Dit is belangrik om ordentlike ramme te gebruik. Koop eerder ramme op 'n ram-veiling waar alle ramme gekeur word of dan van 'n erkende stoetteler.
Van 'n ram kan daar konserwatief bereken 80 lammers per jaar aankry(2 dek seisoene) en as die speenlammers net 3 kg swaarder is teen R33 p.kg is dit R7920 meer.
Die ander faktor naamlik basterkrag deur kruisteling is dalk nog meer belangrik.
Daar is 'n tendens om heeltyd dieselfde ras ramme by dieselfde ras ooie te gebruik.Deur kruisteling kan jy makliker 'n swaarder speenlam teel en selfs jou kudde verbeter.
As jy al jou speenlammers verkoop is daar bykans 10 rasse wat geredelik beskikbaar is. As jy egter ooi lammers terughou en 'n wol komponent het is jou keuses effens minder deur dan net suiwer witwol ram-rasse te gebruik.
Verskillende kruisings waarmee ek uitstekende resultate behaal is om Landskaap ramme op Vleismerino ooie te gebruik.
Die lammers was gemiddeld 3kg swaarder en kon ek die ooitjies as vervangings ooie hou.
Nog 'n uitstekende kruising was Landskaap op Dorper ooie.
In beide gevalle kon ek die lammers vanaf die veld speen en dadelik verkoop.
Daarom is dit beslis die moeite werd om goeie ramme te koop en ook die regte keuse te maak wat betref die ras wat jy gaan ggebruik.