Mielieprys: Te min vir wins

Hoewel daar heelwat onsekerheid is oor die grootte van die huidige mielie-oes, is pryse steeds van só 'n aard dat boere in die komende seisoen moeilik mielies winsgewend kan verbou.

Graan Suid-Afrika het verlede week skerp gereageer op 'n advertensie van die kunsmismaatskappy Profert wat in die pers verskyn het. In dié advertensie word boere aangemoedig om die komende seisoen drie miljoen hektaar mielies te plant. In 'n artikel wat onlangs in Landbouweekblad verskyn het, maak twee direkteure van Profert dieselfde aanbevelings aan boere.

Mnr. Bully Botma, voorsitter van Graan SA, het in reaksie op die advertensie gesê dit is ''onverantwoordelik'' om mielieboere aan te moedig om drie miljoen hektaar of selfs meer mielies in die komende seisoen te plant.

Botma het ook gesê dit sal onverantwoordelik van enige mielieboer wees om te hoop op beter pryse weens 'n droogte. 'n Beroep word op boere gedoen om hul produksiebesluite op werklikhede te skoei en nie spekulasie nie, sê hy.

Profert en sommige markspelers meen daar is nie werklik soveel mielies as wat die Oesskattingskomitee aandui nie. Luidens die komitee moet die kommersiële oes 12,180 miljoen ton wees. Omdat minder as 10 miljoen mielies tot dusver gelewer is, word genoem dat die huidige oes moontlik oorskat is.

Die jongste inligting oor boere se voorneme om te plant toon boere wil op 42 % minder hektare mielies plant as verlede jaar se 2,9 miljoen hektaar.

Mnr. Dries van Schalkwyk, bestuurder vir die termynmark by Unigrain op Randfontein, sê dit blyk die mielieprys word nou primêr deur weervooruitsigte gerig. Hy sê reën word vir later vandeesmaand voorspel, maar intussen bring droë toestande mee dat pryse styg. Van Schalkwyk reken pryse sal na aan R900 per ton tot R950 per ton beweeg, met die ondersteuningsvlakke rondom R800 per ton.

14 Oktober 2005