Minder landbouwerktuie verkoop

Altesaam 11 % minder trekkers is in die eerste elf maande van dié jaar verkoop in vergelyking met die ooreenstemmende tyd verlede jaar. Die 403 trekkers wat in November verkoop is, is 4 % minder as in die ooreenstemmende maand verlede jaar.

Volgens die Suid-Afrikaanse Landboumasjienerie-assosiasie was daar 'n skerp daling in stroperverkope. Dit is 'n weerspieëling van die verswakkende toestande vir koringverbouing in die Vrystaat. Net nege stropers is in November verkoop teenoor die 30 in November verlede jaar, 'n daling van 70 %. In die eerste elf maande van vanjaar is 34 % minder stropers verkoop as in die ooreenstemmende tyd verlede jaar.

Balerverkope was in November 61 % hoër as in November verlede jaar, maar vir die eerste elf maande van die jaar was daar 'n daling van 1,3 % teenoor die vorige jaar.

Trekkerverkope het gedaal in die gebiede waar daar tradisioneel mielies verbou word, maar in die ander gebiede is dit goed. Volgens die verklaring bly dit 'n kopersmark wat deur boere benut word om trekkers te vervang.

Die goeie balerverkope dui daarop dat talle boere groter klem lê op die veefaktor en hooi maak waar hulle kan.

16 Desember 2005