Minister het geen antwoorde oor LNR

Die Parlement is steeds in die duister oor die stand van sake by die Landbounavorsingsraad (LNR). 'n Versoek deur die parlementêre portefeuljekomitee vir landbou en grondsake aan me. Thoko Didiza, Minister van Landbou en Grondsake, om die toestand te verduidelik, het niks opgelewer nie.

Volgens Didiza is dit omdat die raad van die LNR wat die interne ondersoek na beweerde ongerymdhede in die LNR doen, nog nie tot 'n gevolgtrekking gekom het nie.

Didiza het die komitee tydens 'n toeligtingsessie berispe en gesê dit is jammer sy is nie ingelig oor waaroor die komitee met haar wou praat nie. Sy het gesê die antwoorde wat sy wel aan die komitee kan gee, hou verband met vrae wat sy in Landbouweekblad gelees het.

Dr. Kraai van Niekerk, die DA se woordvoerder oor landbou, het aan Didiza gesê die afgelope twee keer wat die LNR voor die komitee verskyn het, was dr. Nthoana Tau-Mzamane, hoofbeampte, afwesig. Hy het ook nog geen inligting ontvang waarvoor hy al verskeie kere gevra het nie. "Daar's gerugte oor die ondersoek. Ons wil antwoorde hê," het Van Niekerk gesê.

Hy wil weet of daar grootskaalse verdeling in die LNR is en of die departement besig is om die landbou tot niet te maak. (Lees berig op bl. 100).

"Ek het nie geweet ek kom hiernatoe oor gerugte nie," het 'n oënskynlik ontstoke Didiza aan die komitee gesê.

Didiza het om verskoning gevra en gesê sy het nie 'n voorlegging van mnr. Neo Masithela, vorige voorsitter van die komitee, ontvang oor die vrae wat geopper is nie. "Ons is almal bekommerd oor die LNR en ons sal alles doen om dit te red," het sy verseker.

Dr. Manie Schoeman, ANC-lid, kon ook nie op sy vrae antwoorde kry nie. Hy wou weet of Didiza self die interne ondersoek na beweerde ongerymdhede in die LNR gelas het. "As dit deur die raad gedoen is, is ek bekommerd die werklike stand van sake gaan nie na vore kom nie," het hy gesê.

Schoeman wou ook weet waarom die LNR se Instituut vir Veld en Weiding van Roodeplaat na Irene verskuif is — ten spyte van besware deur werkernemers van die LNR. "Dit blyk daar was geen raadpleging nie. Dit dui op 'n ongevoelige houding jeens landbounavorsing," het hy gesê.

Volgens me. Elizabeth Ngaleka, voorsitter van die komitee, gaan die LNR wéér voor die komitee moet verskyn.

1 Julie 2005