NLBR kyk na hulp vir kleinboere

'n Werksessie van die Nasionale Landboubemarkingsraad (NLBR) met belanghebbendes in die mielie-, sonneblom- en sorghumbedryf is onlangs gehou om hulpskemas te ondersoek waardeur ontwikkelende boere marktoegang kan verkry.

Mnr. Chris Gladwin, ekonoom van die raad, sê bystand met bemarking is 'n voorrang vir die raad hierdie jaar en loodsprogramme in die rooivleis-, sitrus en graanbedryf word beplan. Die werksessie was gemik op 'n verkennende gesprek om betrokkenes se gevoel te toets en menings in te win. Hy sê enige skemas wat moontlik kan volg moet met die volle steun van die bedrywe geskied en moet deur hulle bedryf word.

Die mikpunt van sulke bemarkingskemas sal wees om ontwikkelende boere met die bemarking van hul produkte by te staan, om sulke boere by die hoofstroom van kommersiële landbou te betrek en om hul deelname in die markomgewing te verhoog.

Volgens die NLBR word daar gemik na 'n vorm van "geteikende inmenging", vergelykbaar met die steun wat in die gereguleerde markera was, maar sonder dat dit die bestaande mark ontwrig. Die voorneme is om hierdie skemas net vir 'n bepaalde tyd in te stel. Daar sal daarmee weggedoen word sodra ontwikkelende boere in staat is om deel te wees van die kommersiële sektor.

In reaksie op die werksessie het dr. Tobias Doyer, uitvoerende hoof van die Landboubesigheidskamer, gesê landbou-ondernemings en koöperasies is ideaal geposisioneer om te help met krediet, voorligting en marktoegang. Hy meen dit is hoog tyd dat die Regering weer hierdie skema instel. Hy waarsku egter teen skemas wat nie 'n stewige ondersteuningsraamwerk het nie.

1September 2006