AfriForum se hofaansoek om die tribunaal van die Suider-Afrikaanse Ontwikkelingsgemeenskap (SAOG) se bevindinge oor Zimbabwe in Suid-Afrika te laat registreer, gaan vandag in die Noord-Gautengse Hooggeregshof voort, luidens The Citizen.

Dít volg nadat waarnemende regter Neil Tuchten gister sy regsmag in dié gebied bevraagteken het en AfriForum om uitstel gevra het om sy saak in meer besonderhede te stel, luidens ’n berig in Business Day.

Die organisasie verteenwoordig mnre. Louis Fick, Michael Campbell en Thomas Etheridge – almal wit boere wat van hul plase in Zimbabwe verdryf is. Volgens Agri SA het sowat 500 Suid-Afrikaanse boere hul grond in Zimbabwe verloor sedert dié land se omstrede onteieningsveldtog in 2000 begin het.

Grondgrype woed voort
Volgens Allafrica was daar voor die veldtog begin het sowat 4 500 boere in Zimbabwe van wie nou net ongeveer 300 oor is. Sowat 152 van die oorblywende boere word ernstig bedreig. Hy is ingelig oor ’n lys van kommersiële boere wat teikens van onteiening is, sê mnr. Charles Taffs, ondervoorsitter van die Commercial Famers’ Union (CFU).

Die SAOG-tribunaal het verlede jaar in Windhoek bevind dat die Zimbabwiese regering se grondonteieningsveldtog rassisties is en het beveel dat boere wat slagoffers van grondgrype was, vir hul grond vergoed word en dat hul regskoste betaal word. Ondanks dié bevinding en die ondertekening van ’n ooreenkoms vir wedersydse beskerming van beleggings (Bippa) tussen Suid-Afrika en Zimbabwe verlede jaar, het gewelddadige grondgrype toegeneem.

Die eerste stap
Volgens AfriForum sê mnr. Temba Mliswa, woordvoerder vir die Zimbabwiese regering, dat sy “regering daartoe verbind is om alle wit boere uit die land te sit”. Nóg Suid-Afrikaanse boere is sedert begin vanjaar van hul grond verdryf.

Mnr. Dolf du Toit en sy gesin van die Myazura-distrik, mnr. Ray Finaughty en sy gesin van Manda Farm en mnr. Gavin Woest in die Rusape-omgewing moes vlug, lui ’n berig van Allafrica.

Die doel van AfriForum se aansoek is om toestemming van die hof te verkry om die Zimbabwiese regering as ’n party te voeg in ’n hofaansoek teen dié land, luidens ’n verklaring van die organisasie. “Dit is die eerste stap in ’n regsproses wat ons toestemming sal gee om ’n regsverteenwoordiger na hulle (Zimbabwe) te stuur om hofdokumente te oorhandig,” sê mnr. Willie Spies, AfriForum se regsverteenwoordiger, luidens ’n berig van IOL.

Bron:
Allafrica
IOL
Business Day
AfriForum
The Citizen

13 Januarie 2010