Die tabakbedryf verskaf werk aan 7 uit elke 10 mense in Malawi. Foto: CHARL VAN ROOYEN
’n Raamwerkkonvensie oor tabakbeheer kan dié bedryf in Afrika pootjie, met die Wêreldgesondheidsorganisasie (WGO) wat die uitfasering van tabakboerdery voorstel.
Luidens ’n
berig op
Sake24.com laat dié dokument tabakboere se nekhare rys, want dit kan werksgeleenthede benadeel en ekonomieë laat verswak.
Die dokument stel voor dat regerings op die vasteland ’n beperking moet plaas op die hoeveelheid grond wat gebruik mag word om tabak aan te plant. Die WGO wil ook hê dat die beheerliggame van die bedryf wat met regerings skakel, ontbind moet word.
Intussen sê die
Tabakkwekersvereniging van Afrika hy is gereed om teen die organisasie en die dokument weerstand te bied.
30 miljoen tabakboereVolgens die vereniging bestaan sowat 30 miljoen
tabakboerderye wêreldwyd en is miljoene mense in Afrika vir hul inkomste van die bedryf afhanklik. Dit is ook ’n beduidende bron van buitelandse valuta vir die vasteland.
“In
Malawi is 7 uit elke 10 werkers regstreeks of onregstreeks van die bedryf afhanklik vir hul werk. Die tabakbedryf sorg vir 70% van die land se buitelandse valuta en maak 15% van
Zambië se bruto binnelandse produk uit,” lui ’n verklaring.
Mnr. Francois van der Merwe, voorsitter van die
Afrika-streek van Tabakprodusente, sê hulle is gereed om weerstand te bied teen ’n organisasie wat hoofsaaklik uit gesondheidsamptenare bestaan wat geen begrip het van die landbousektor nie.
Bron –
Sake24.com
