Dié reaksie volg op nóg ’n aanval wat die ANC-jeugliga die afgelope week gedoen het op “wit boere” en die land se Grondwet, wat eiendomsreg beskerm,.

Pakendorf, ’n bekende politieke ontleder, sê dit is voor die hand liggend dat boere hulle sal bekommerd oor die uitsprake wat gemaak word. Hy meen egter dat boere meer moet fokus op dít wat die party se hoofleiers sê en nie wat “die massas kwytraak” nie. “Ons moet onthou dat die ANC ’n groot organisasie is, dus baie verskillende standpunte sal binne die party bestaan.”

In dieselfde week wat die ANC-jeugliga kritiek uitgespreek het, het mnr. Gwede Mantashe, sekretaris-generaal van die ANC, sogenaamde “super boere” ontmoet om hul menings oor grondhervorming en voedselsekerheid te vra. Volgens mediaberigte het Mantashe gesê hoewel hulle grondhervorming wil toepas, is die party ook bedag op voedselsekerheid.

Leierloos
Pakendorf sê geen twyfel bestaan dat die ANC tans “leierloos” is nie. “Zuma sê die minimum en laat die spreekwoordelike Gods water oor Gods akker loop omdat hy nie sy kans op ’n herverkiesing in Mangaung in Desember wil kelder nie.”

“So, ek wil vir boere sê dié uitsprake gaan nog kom, en dit gaan heel moontlik onbeantwoord bly deur die hoofleiers, maar steur julle aan dít wat die hoofleiers sê,” aldus Pakendorf. Die ANC hou einde vanjaar sy nasionale verkiesingskonferensie in Bloemfontein.

Intussen sê dr. Theo de Jager, ondervoorsitter van Agri SA, die ANC maak ’n fout om met individuele boere te praat en nie met landbou-organisasies wie se leiers gekies is om namens boere te praat nie. Luidens ’n berig in Die Burger het De Jager op Mpumalanga Landbou se jaarlikse kongres gesê die ANC kan die hele bedryf beïnvloed as hy praat met die mense wat deur die hele land se boere verkies is om namens hulle te praat.

“Probleme moet uitgepraat word, maar as jy kortpaaie vat, beland jy in ’n doodloopstraat. Daar is nie maklike antwoorde op moeilike vrae nie,” aldus De Jager.

Uitsprake
Wat wilde uitsprake betref, sê De Jager: “Dit is beter om nou kalm te bly en nie te val vir uitlatings soos dié (deur Lamola) nie. Ons moet nie paniekerig raak nie. Onthou net, hy (die jeugliga) is nie ’n beleidmaker nie, maar bloot ’n beïnvloeder, soos ons.”

Volgens De Jager weeg die landbou se steunbasis swaarder as dié van die jeugliga: “Ek besef dis ’n hansworsjaar en dit gaan nog erger word voor die ANC se leiersverkiesing einde vanjaar.” Hy sê Agri SA sal intussen met sy gesprekke met die ANC voortgaan, en by die reëls hou en nie buite die Grondwet optree nie.